المدونة

نعرض أحدث الآراء و التحليلات لأبرز مدوني هافينغتون بوست عربي

ياسمين مدكور  Headshot

كيف ساعدتني "البوجو" في ترتيب وقتي ومهامي والتخطيط لرمضان

تم النشر: تم التحديث:

ملحوظة: التدوينة بالعامية المصرية

هل اتكعبلت قبل كده على النت أو في مكتبة في أجندة حلوة جداً، وقلت في بالك "الله دي حلوة أوي بس يا ريت لو كان فيها صفحة لكذا أو كذا؟"، أو جربت ياما ترتب وقتك على أبليكيشنز بالعبيط وكنت بتنزلهم وتستخدمهم يوم والتاني وبعدها بخ ولا كأنك نزلت أي حاجة وترجع زي ما كنت؟ أو بتحتار إيه الأبليكيشن المناسب لترتيب وقتك ومهامك وشغلك والمشاوير وأمور البيت والعيلة والمواعيد والشغل والإيميلات اللي عاوز ترتبها والكتب اللي عاوز تقراها والتمرينات اللي عاوز تلعبها والوصفات اللي عاوز تجربها والمطاعم اللي عاوز تروحها واصحابك اللي بقالك كتير ما قابلتهمش و....و ....و ...؟

كل ده ممكن يتحل بطريقة جديدة في تدوين الملاحظات وترتيب الوقت والمهام وكل الحاجات اللي عاوز تفضل واخد بالك منها في حياتك من أول صحتك لحد الكتب اللي عاوز تقراها.

الطريقة دي ممكن يستخدمها أي حد، وممكن تناسب أي حد، خصوصاً:

اللي بيحبوا يستخدموا الورقة والقلم.
اللي بيحبوا الأجندات والستيشنري Stationary.
اللي بيحبوا يرسموا.
اللي ماشيين في حياتهم وفيه طول الوقت أهداف عاوزين يحققوها.
اللي بيشتغلوا في أكتر من حاجة.
اللي دايماً على بالهم أكتر من حاجة محتاجة تتعمل.
اللي عندهم مشكلة في ترتيب أولوياتهم.
اللي بيستخدموا أكتر من أبليكيشن أو نوتة لترتيب مهامهم بدون فايدة.
المهم، إيه هي البوجو (بتعطيش الجيم)؟
هي اختصار لمصطلح Bullet Journal - واللي بيرمز له ببساطة بكلمة BuJo. ودي طريقة لتنظيم المهام والوقت والحياة والتخطيط الشخصي والتدوين اليومي الورقي وأي حاجة ممكن تيجي في بالك، من غير ما تبقى متقيد باسطمبات معدة مسبقاً.. يعني إيه؟
يعني بدل ما بتشتري أجندة فيها كل حاجة جاهزة وتبقى نفسك لو كان فيها حاجة زيادة أو جدول لحاجة معينة أو حاجة خاصة بيك عارف إنها عمرها ما هتبقى موجودة، البوجو بتساعدك على ده؛ لأنها ببساطة نظام شديد الخصوصية والشخصية جداً، وبالتالي انت بتشكلها زي ما انت عاوز.

البوجو نظام نشره وصممه رايدر كارول، مصمم منتجات وكان عامله لنفسه، خصوصاً وإنه عنده ADD من صغره (فرط الحركة ونقص الانتباه) وببساطة شارك الفكرة مع غيره، ومن هنا الفكرة ابتدت تنتشر وبقالها حوالي 3 سنين وأعداد الناس اللي بتستخدم النظام ده في ازدياد؛ لأنه ببساطة سهل التحكم فيه، وفي تفاصيله، ولأن له جوانب تانية مفيدة زي اليقظة وإيقاظ الحس الفني وحاجات كتير هتكلم عنها بعدين في بوست جاي.

طيب نبدأ منين؟ وشكلها عامل إزاي دي؟

أولاً: البوجو عبارة عن أي كشكول، نوتة، دفتر، مجموعة ورق مدبسة بالدباسة وبتسميه أجندة.. أي دفتر من أي نوع ينفع تستخدمه.

ثانياً: فيه شوية مصطلحات هنستخدمها في كلامنا عن البوجو ومهم نفهم كل واحد فيهم معناه إيه.
مخطط أسبوعي - Weekly log: وده اللي بتكتب فيه المهام والمواعيد اللي محتاج تنجزها في الأسبوع.
مخطط الشهر - Monthly log: نفس الشيء للشهر.
مخطط يوم - Daily log: نفس الشيء لليوم.
المجموعات - Collections: مجموعات ما لهاش تاريخ محدد ممكن تبقى تجميعة لوصفات أكل، لقايمة أصدقاء، للكتب اللي عاوز تقراها، الأفلام اللي عاوز تشوفها، الحاجات اللي نفسك تجيبها لنفسك، البلاد اللي عاوز تسافر لها....إلخ.
السجل المستقبلي - Future log: وده بيبقى عبارة عن المواعيد والخطط المستقبلية اللي مش في خلال الشهر/الأسبوع/اليوم الحالي، لكن مهم إننا نسجله عشان نعمل حسابنا لما نيجي لوقته.
جدول المتابعة - Tracker: وده جدول أو ما يعادله لمتابعة أي شيء من أول نفقاتك، لحد بتصحى الساعة كام.

ثالثاً: كلاسيكيات البوجو الأساسية:

الفهرس: الصفحات 1-4 بتخصصهم للفهرس بتاع البوجو بتاعتك أو Index .. زي ما هو موجود في الصورة اللي تحت. وإضافة لذلك احنا بنرقم كل صفحة في البوجو وإحنا ماشيين فيها، وبنسجل الصفحات في الفهرس، ودي حاجة مش مرهقة زي ما هو متوقع، وفيه بعض الدفاتر مترقمة وفيها فهرس بالفعل في البداية، وفيه بعض الطرق للتحايل على موضوع الترقيم باستخدام الألوان هشاركها معاكم في بوست تاني إن شاء الله.

ramadan

ramadan

السجل المستقبلي: وده بنقسم 4 صفحات على الشهور عشان تبقى جاهزه لتسجيل أي مواعيد. أو خطط في أي وقت بيتم الرجوع ليه قبل التخطيط لكل شهر.

ramadan

المجموعات: بعد السجل المستقبلي ممكن تضيف المجموعات اللي تحبها حسب اهتماماتك واللي عاوز تخصص له صفحة أو صفحتين مخصوصين ليه. أنا مثلاً عاملة صفحة للكتب اللي عاوز أقراها وصفحتين للأكلات اللي طبختها وعجبتني، وصفحتين لخطط المدونة بتاعتي والمواضيع اللي عاوزه أكتب فيها السنة دي، وأربع صفحات عشان أكتب فيهم مقتبسات عجبتني من الكتب اللي قريتها أو من الانترنت، وصفحة للحاجات اللي نفسي يوماً ما أجيبها/أعملها، وصفحة للأماكن والبلاد اللي نفسي أزورها وصفحتين للتمارين الرياضية اللي عاوزه أواظب عليها.

ramadan

المخطط الشهري: وده بياخد أي شكل من الأشكال اللي تحبها، سواء الشكل المعتاد اللي بيبقى في الأجندات أو أي شكل تاني (وهنشر لاحقاً هنا أشكال مختلفة كل فترة لأكتر من حاجة)، لكن الشكل الكلاسيكي للبوجو هو إنك بتكتب أرقام الأيام على الشمال وتكتب جنبها على اليمين الخطط بتاعتك فيه باختصار.

ramadan

السجل اليومي: وده اللي بتحط فيه كل شيء متعلق باليوم، وده يخلينا نتكلم عن مفتاح البوجو.

ramadan

مفتاح البوجو: هو تفسير لمجموعة الرموز اللي بتستخدمها عشان توفر على نفسك وقت وتفهم لوحدك إيه اللي انت كاتبه. (الصورة اللي تحت بتوضح ده أكتر).

ramadan

سجل الامتنان اليومي Gratitude log: وده اختياري لكن أغلب الناس اللي بتستخدم البوجو بيستخدموه، وهو إنك بتكتب حاجه إنت شاكر أو ممتن ليها أو لوجودها في حياتك، ودي بالمناسبة مع الوقت بتكتشف حاجات بسيطة جدًا مكنتش مستوعب قد إيه تستحق الشكر والامتنان.

جدول المتابعة: وده الجدول اللي بيساعدك تتابع أي شيء محتاج متابعة يومية أو أسبوعية زي العادات اللي محتاج تواظب عليها أو تبطلها، زي الرياضة والسجاير والأكل الصحي والصحيان في معاد معين وغيرها.

ramadan

ممكن تغيروا من شكل البوجو تماماً باللي يناسبكم وممكن تلعبوا في الأشكال أو ترسموا وتلونوا وده في نظري أهم من البوجو نفسها؛ لأنها بالنسبة لي على المستوى الشخصي تمرين من تمارين اليقظة في ذاتها.
ده مثلاً شكل البوجو في آخر صفحتين عندي (الأزرق ده إيديتنج عشان الخصوصية).

ramadan

ودي مثلاً نوتس بعد كل جلسة therapy بكتبها عشان أبقى فاكرة اللي اتكلمنا فيه وإيه اللي ناوية أشتغل عليه أو إيه اللي محتاجة أفتكره وطول الفترة لحد الجلسة اللي بعدها بكتب في الجزء الخاص بالجلسة الجاية عشان أبقى محضرة لو فيه حاجة معينة عاوزه أتكلم فيها. (اللي متلون ده للخصوصية برضه).

ramadan

بما إن رمضان داخل علينا، لقيت أكتر من براند عاملة نوتبوك لرمضان، بعضها حسيت إنه زحمة جداً وتفاصيل أكتر من اللي أنا عاوزاها وبعضها حسيته مش مناسب، والبعض كان لطيف لكن حسيت إني عاوزه أغير فيه حاجة أو أكتر. وبالتالي فأنا قررت إني أخطط لرمضان في البوجو بتاعتي. ودي صور بعض المخططات اللي شايفاها تناسبني، ممكن أي حد يجرب يعمل ده باللي يناسبه هو، وهو ده أحلى ما في البوجو إنها غاية في الشخصية تماماً وسهل إن أي حد يطوعها لاحتياجاته وأهدافه.

دي صور البوجو بتاعتي في رمضان (أكتر من ديزاين لليوم - بنفس التمبليت):

ramadan

Welcome Page - صفحة ترحيب

ramadan

حددت 3 أهداف لرمضان السنة دي ودي الـtrackers بتاعتهم، وجنبها ملاحظات إيه اللي نفع وساعدني فيهم وإيه اللي ما نفعش. كذلك مربعات تخص الدورة الشهرية (Period) لأن زي كل سنة وزي أغلب النساء بننسى كام يوم فطرناهم في رمضان وبالتالي لخبطة في صيام القضاء بتاعهم.

ramadan

صفحة للأدعية سواء الحاجات اللي عاوزة أدعي بيها أو أدعية قريتها وعاوزة أحتفظ بيها.

ramadan

أول يوم كان شكله تقليدي جداً شبه الأجندات جداً، ما عجبنيش غيرت فيه وبعدين وصلت لليوم التالت لقيتني برسم وبلون. اليوم قسمته على ساعات ومعاد كل صلاة في خانة (هنا على شكل لمبة) وفي اللمبة معاد الصلاة ولما أصليها في معادها هلونها بالأخضر ولو فاتتني هلونها بالأحمر. كذلك القيلولة. وعلى اليمين المنيو بتاعة الفطار عشان نعمل حسابها وإحنا بنحضر الفطار أو عشان أبقى عارفة لو معزومين نشتري حاجة أو نعمل حاجة في البيت قبل ما نوصل ولو هنطلب دليفري نفس الشيء عشان في رمضان الدليفري لازم يتطلب من بدري. والمساحة الفاضية دي عشان الكتابة عموماً.

ramadan

أخيراً مش لازم ترسم ولا تلون ولا أي حاجة من كل الكلام ده، يكفي إنك تستخدمها بالطريقة اللي تريحك واللي تجيب نتيجة، والنتيجة هنا إنك بالفعل ترتب حياتك أحسن وتبقى أكتر إنتاجية وتركيز.

لو عاوز تقرأ أكتر عن البوجو بالعربي اعمل شير للتدوينة دي.

- تم نشر هذه التدوينة في المدونة الشخصية لياسمين مدكور

ملحوظة:

التدوينات المنشورة في مدونات هاف بوست لا تعبر عن وجهة نظر فريق تحرير الموقع.