المدونة

نعرض أحدث الآراء و التحليلات لأبرز مدوني هافينغتون بوست عربي

محمد فايق فايز Headshot

17 معلومة تلخص فهم الرجال للحياة الزوجية

تم النشر: تم التحديث:

ملحوظة: التدوينة بالعامية المصرية.


بصي يا ست الكل.. مبدئياً إحنا ناس كبار وشطار وواعيين وعارفين إن مفيش أي حاجة مطلقة أو عامة بنسبة 100٪‏، يعني وارد جداً إن الكلام اللي هقوله يكّون فيه استثناءات وكده.. آمين؟

1- فيه سمعة سيئة وفكرة عامة عن هرمون الذكورة (Testosterone) إنه مسؤول عن الرغبة فقط وبيخلي الراجل كائن غرائزي متوحش.. وده مش صحيح أوي..
أيوة هو مسؤول عن الغريزة وكل حاجة بس كمان مسؤول عن قوة الراجل وإصراره على تحقيق أهدافه..

مسؤول عن الصمود قدام المخاطر بصفة عامة.. مسؤول كمان عن الهمة والإحساس بالنجاح.. ومسؤول كمان عن الغيرة عليكي وعلى دينه وعلى وطنه وناسه وعلى أهله وعلى كل حاجة هو بيحس إنها منتمية ليه أو هو منتمي ليها.

التستوستيرون كمان مسؤول عن تكوين دايرة من الأملاك النفسية حوالين الراجل ما يحبش أي حد تاني يقرب منها.. حضرتك طبعاً من ضمن الأملاك النفسية دي.

2- نجاح الراجل وإحساسه بالإنجاز بتتم ترجمته في قشرة المخ لإحساس بالوجود.. الراجل لما يفشل في طموحاته بيكون مكسور ومحبط.. الست كمان كده طبعاً، بس الموضوع أشد عند الرجالة.

3- الأكل مش مهم أوي عند الراجل زي ما الرجالة نفسهم فاكرين وبيروجوا للفكرة.. الراجل لو مستغرق في شيء بيحبه وبيحسسه بالإنتاج والإنجاز ممكن ينسى الأكل وينسى الدنيا كلها "مؤقتاً" بما فيها إنتي للأسف.

4- بمناسبة الإنتاج بقى، الرجالة بتعرف نفسها ووجودها على قيد الحياة عن طريق الإنتاج أولاً.. لازم جوزك يحس إنه شخص منتج وليه لازمة في الدنيا.. وحضرتك كزوجة لازم تحسسيه إن دي أولوية عندك.. لما تحسسيه إن الحب والرومانسية هما أهم حاجة عندك، هيفرط منك بعد شوية وهيفرفر ويسكت.

5- الحب حلو ولذيذ ومنعش وكل حاجة.. بس مش هو رقم واحد عند الراجل.. إحساسه بإنه شخص له اعتبار ولازمة هو رقم واحد.. يعني لو جوزك مش عاجبه شغله أو حاسس إنه مش في مكانه أو مش ناجح حتى لو نجاح بسيط، هيبقى مكتئب على خفيف وما عندوش طاقة للحب اللي إنتي محتاجاه.

6- قبل ما جوزك يتجوزك بتكوني مشروع بالنسبة له.. ماشي بيحبك وكده بس هو بيشوف الموضوع تحدي ومشروع.. الرجالة في العموم تحب التحديات؛ لأنها بتحفز جواهم غريزة الصياد.. وعشان كده بيكون مهتم بنجاح المشروع.. بعد ما المشروع ينجح وتتجوزوا بالسلامة، بيبدأ بالتدريج يركز على مشاريع تانية.

ممكن المشاريع دي تكون شغله وطموحه، وممكن تكون ستات تانية للأسف (واتكلمنا عن النقطة دي قبل كده ومش عايزين مشاكل بقى).

7-
الراجل الطبيعي السوي، بيحب المسؤولية ويحب يسد فيها ويكون قدها.. وإنتي والعيال جزء من مسؤوليته بس مش مسؤوليته كلها..
يعني لازم حضرتك تفهمي إن الراجل الطبيعي هيحس بالمسؤولية ناحية أهله وناحيته أصحابه وناحية شغله وناحية المجتمع كمان.. الست بردو كده عادي، بس الراجل أكتر.

8- لو إنتو الـ2 طبيعيين ومتكافئين ومفيش مشاكل في البنية التحتية بينكم، تأكدي إن جوزك بيحبك وبيخاف عليكي وإنتي غالية عنده أوي أوي وبيعتبرك زي بنته من ناحية الغلاوة.. بس المشكلة إنه مش هيعبر عن كده دايماً بالصورة اللي حضرتك محتاجاها وبتشوفيها في الرومانسيات اللزجة في الأعمال الدرامية والروايات..
ساعة الجد هتعرفي وهتحسي هو بيحبك قد إيه..


9- الرجالة بتحب الأعمال اليدوية حتى لو هيركب لمبة في البيت.. بس بيكسل عشان في دماغه دايماً هموم ومسؤوليات كتير.. اصبري..

10- لما تستفزي طاقة العند في الراجل بالخناق والإهانة والخروج عن حيّز أملاكه النفسية، الراجل غالباً هيحطك في خانة الأعداء لا شعورياً.. لو فيه حاجة مش عاجباكي، استخدمي حواسك الأنثوية الثاقبة في اختيار الوقت المناسب عشان تلفتي نظره للحاجة دي بدون عتاب أو لوم وتقريع..

11- العلاقة الزوجية مهمة عند الراجل أكتر من مجرد غريزة أو شهوة.. فيه حاجة built in في الراجل بتخليه متوازن ومستقر نفسياً لما يكون مبسوط في الموضوع ده.. إوعي تستهوني بيه أو تحسسيه إنه حيوان مثلاً عشان النقطة دي..

12- الراجل بيحب التغيير زيك.. بس مش في كل حاجة.. يعني ما تغيريش مكان شراباته فجأة أو نظام نومه أو أي روتين في حياته كده اعتباطاً.. لازم تمهيد وكده..

13-
التغيير فيكي إنتي شخصياً بيفرق معاه حتى لو حسيتي العكس.. بس بلاش التغيير يقتصر على الحاجات الشكلية بس.. التغيير فن ومحتاج ذكاء.. فاهماني طبعاً..

14-
اهتمامك بالعيال على راسنا من فوق والله.. بس لازم تفهمي إن الراجل معندوش الطاقة الربانية والصبر اللي عندك في التعامل مع العيال.. بلاش تلبسيه في حيطة وتطلبي منه باستمرار يساعدك في الحاجات اليومية اللي تخصهم.. الراجل بيوجه معظم طاقته خارجياً مش داخلياً.. لو شوفتيه مش مركز معاكي أوي، ما تزعليش.. وطبعاً خارجياً دي ممكن للأسف الشديد تشمل نساء أخريات..

15- الحلال والحرام لا يجتمعان في قلب إنسان.. خلي تركيزك على النقطة دي.. لو تركيزك على الإخلاص كمبدأ، معظم الرجالة هيعتبرك بوليس وهيخبي عنك.. خليكي زي أمه في الحتة دي.. انصحيه لمصلحته..

16- البيت مكان الراحة والسكن المفروض.. لو البيت تحول لمكان خناق مستمر ولوم وعتاب وقلق، إنتو الي٢ مش هترتاحوا.. خلي بيتك مليان روحانيات وطاقة إيجابية..
إزاي؟
العبادة الربانية والهدوء في النقاش والبشاشة والتعامل اللطيف..
ماشي ممكن جوزك يرجع من برة متعفرت ومش طايق نفسه وإنتي مش عارفة في إيه؟!
اسكتي واستقبليه ببشاشة وهدوء.. هو لوحده بعد شوية هيقول.. ولو مقالش، اسأليه بهدوء تاني يوم عادي ما فيهاش حاجة..

17- حسسي جوزك إنه أحسن راجل في الدنيا وخليكي في صفه.. بلاش عملية رص المعلومات والمتطلبات والمسؤوليات ورا بعض.. إنتي قلقانة أنا عارف.. بس هو عارف مسؤولياته ما تخافيش.. مش محتاج تذكير مستمر بيها عشان ده بيعمل ضغط من لا شيء..

الكلام ده عن الرجالة الطبيعيين الأسوياء..
في مقال تاني بإذن الله عن الرجالة غير الأسوياء.

ملحوظة:

التدوينات المنشورة في مدونات هاف بوست لا تعبر عن وجهة نظر فريق تحرير الموقع.