المدونة

نعرض أحدث الآراء و التحليلات لأبرز مدوني هافينغتون بوست عربي

محمد فايق فايز Headshot

قصة إبراهيم ويارا في معركة جواز الصالونات

تم النشر: تم التحديث:

ملحوظة: التدوينة بالعامية المصرية

- بقول لك إيه يا عبدو، لازم تكلم يارا قبل ما العريس ييجي!
* أكلمها أقول لها إيه يا سميرة؟
- تقول لها إيه؟؟.. فيه إيه يا عبدو؟.. انت عاجبك اللي بتعمله مع كل عريس ييجي يتقدم عشان تطفشه؟
أنا مش فاهمة هي عايزة إيه بالظبط!
* سيبيها براحتها يا سميرة.. يارا مش صغيرة وأنا بثق في تفكيرها.
- أهو كلامك ده هو اللي مقويها على اللي هي بتعمله!.. خليها بقى جنبك وتقعدوا تثقوا في تفكير بعض!

-----------------------------

(يارا قاعدة مع العريس)
- أهلاً بيكي يا آنسة يارا..
* أهلاً بيك يا أستاذ آ.... معلش هو حضرتك اسمك إيه؟
- إبراهيم.
* أهلاً بيك يا أستاذ إبراهيم.
(الموبايل بتاع يارا بيرن)
معلش بس تسمح لي أرد؟
- أكيد.. اتفضلي.

* ألو.. أيوة يا أمنية.. تمام الحمد لله انتي عاملة إيه.. أيوة العريس جه.. أيوة قاعد بيعاين البضاعة أهو.. لا لا قاعد أهو ف الكرسي اللي قدامي.. أيوة طبعاً سامعني.. لا هتكسف من إيه مش دي الحقيقة!.. طب خلاص هكلمك بعدين.. أوك باي يا قمراية..
سوري يا أستاذ إبراهيم معلش دي أمنية صاحبتي كانت بتسألني إذا كان تاجر الجواري وصل ولا لِسَّه.
- امممم.. تاجر جواري ويعاين البضاعة.. طبعاً انتي مستنية رد فعل سلبي مني كأي شاب هيسمع كلمتين زي دول هيقوم يمشي ويقول (سوري يعني) أبو شكلها.. صح؟

* أبو شكلها؟؟!!!.. مستوى الحوار تدنى قوي يا أستاذ إبراهيم - ولاحظ إني لِسَّه بقول لك يا أستاذ ولاحظ كمان إنك ف بيتنا!!
- اهدي بس واقعدي بعد إذنك يا آنسة يارا.. انتي اديتي نفسك الحق إنك تكوني صريحة.. ليه زعلانة إني اديت نفسي الحق إني أكون صريح بردو؟
* بس مش لدرجة أبو شكلها!!
- مع إن دي أقل حاجة هتيجي ف دماغ أي شاب مكاني، لكن أنا آسف على اللفظ..
وبما إنك جريئة وبتعبري عن آرائك بحرية كده، يا ترى ممكن تتناقشي بنفس الجرأة والتفتح؟
* أكيد.. بس للأسف مش بتناقش كتير مع الرجالة!
- ممكن أعرف ليه؟
* ممكن قوي قوي.

شوف.. الرجالة يا أستاذي الفاضل مستحيل يكونوا محايدين في أي نقاش مع بنت.. ليه؟؟.. عشان ذكوريتهم عاملة قوالب جامدة وافتراضات مسبقة في دماغهم نتيجة لعوامل التربية المتخلفة اللي بتفترض تلقائياً فوقية واستعلاء للراجل لمجرد إنه أقوى جسدياً والمفروض إنه مسيطر وبتاع.. وده بيخليهم متحيزين لآراء معينة وهما مش حاسين.. وغصب عنهم -لا شعورياً- بيظهر التحيز جداً في أي نقاش أو حوار.
- ممكن أطلب منك تخاطري وتجربي معايا نقاش؟.. و الله لو طلعت ذكوري متعفن، مش هتخسري حاجة.. هاخد التورتاية الرائعة اللي أنا جايبها وأروح أضربها مع صحابي ويا دار ما دخلك شر.. إيه رأيك؟
* هو مبدئياً مش هتاخد التورتاية؛ لأنها تعتبر زي كشف الدكتور كده.. لازم تدفع عشان تخش تكشف.. ومفيش دكتور بيرجع تمن الكشف حتى لو ما طلعش الشخص عيان.. تقدر تعتبرها مقابل للوقت اللي أنا ضيعته معاك في القعدة اللطيفة دي..
- أقنعتيني.. طب تمام.. نتناقش بقى؟
* اتفضل.

- تعالي نفترض إن حضرتك ومجموعة من زملائك وزميلاتك في الشغل قاعدين في شركة.. وكلكو سنجل.. بعد شوية بتلاقي في علاقات بدأت تتكون والكابلز بدأوا يظهروا.. أحمد مع أميرة.. سها مع طارق.. حنان مع إبراهيم.. تقى مع محمد.. وهكذا.. موافقة إن ده بيحصل في الواقع ولا لأ؟
* تمام بيحصل.
- كويس جداً، تفتكري ليه وإزاي ده حصل؟؟
ما هو بردو كل واحد تلقائياً وبدون تخطيط، عاين البنات اللي موجودين وكل بنت عاينت الشباب اللي موجودين.. وده السبب اللي بيخلي نسبة كبيرة من الارتباط تتم في الجامعة والشغل والجيران والقرايب والمعارف.. لأن الدواير الاجتماعية دي عبارة عن معرض جواري وعبيد كبير على حد تعبيرك يعني.

* أيوة بس ده بيتم بطريقة تلقائية زي ما انت قلت.. احنا مش رايحين الجامعة أو الشغل عشان نحب ونختار ونرتبط!.. الموضوع بيحصل لوحده.. وممكن ما يحصلش!
- إذن المشكلة مش في عملية المعاينة ذات نفسها؛ لأنها كده كده بتتم حتى لو في الشارع!.. المشكلة في تخصيص زمان ومكان لعملية المعاينة دي، واللي بنقول عليه "قعدة صالونات" أو جواز صالونات، صح؟
*مش فاهمة.. عايز توصل لإيه؟
- عايز أوصل إن حضرتك مش مضايقة إن واحد يعاينك وتعجبيه أو ما تعجبيهوش.. لأن بمجرد نزولك الشارع، انتي عارفة كويس إن نسبة كبيرة من الرجالة وحتى البنات والستات، هتعاينك من فوق لتحت!

انتي متضايقة من الطريقة المترتبة اللي بيتم بيها الموضوع.. وهزة الثقة بالنفس اللي ممكن تجيلك لو اترفضتي!
*أممممم.. هو أنا مش بترفض طبعاً؛ لأن أنا دايما اللي برفض.. بس كلامك منطقي.. فعلا التركيز على عملية المعاينة بالصورة اللي بتتم في جواز الصالونات هي اللي بتكون مصدر توتر للبنت.. وكمان ضغط الأهل إنها لازم تدي أخطر قرار في حياتها في فترة زمنية قصيرة جداً جداً!
- أشكرك على صراحتك.. وموافقك على كلامك.. وخدي بالك إن أنا كمان كشاب جاي يتقدم متعرض لنفس العملية ونفس الاحتمال للرفض.. وبردو مطلوب مني في وقت قصير آخد أخطر قرار في حياتي.. وممكن بردو أتعرض لهزة في ثقتي بنفسي لو البنت هي اللي رفضتني.

* أيوة بس أنت راجل.. البنت أكيد بتتأثر أكتر بكتير!.. و بعدين ليه كل ده أصلاً؟!! ليه الطريقة دي؟!
- هحاول أجاوبك.. بس اعتبر ده اعتراف إن البنت أكثر هشاشة نفسية من الرجل؟؟
* انت لئيم قوي!.. بس للأسف كلامك صح.. في المتوسط أيوة البنت طبعاً أكتر هشاشة نفسية من الراجل؛ لأنها بنت وده جزء من تكوينها.
- إذن المشكلة مش جواز الصالونات كمبدأ.. المشكلة في الطريقة اللي ممكن تضغط على البنت وتحسسها إنها في اختبار معاينة وتطلب منها قرار سريع، صح؟
* تمام صح.. وفي الحالة دي رجعنا لنفس النقطة.. الموضوع بايخ وسخيف وبيحط البنت في موقف مش لطيف وضغط نفسي ومخاطرة إنها ممكن تتهز وتفقد ثقتها بنفسها شوية..
- طيب و الناس اللي معندهاش دواير اجتماعية كافية عشان تختار منها شريك حياتها يعملوا إيه؟! و كمان الناس اللي رافضة مبدأ الارتباط قبل الجواز تعمل إيه؟!

* يبقى كل بنت تختار اللي يناسبها بقى!
-حلو قوي.. إيه بقى المانع إن يكون جواز الصالونات وسيلة متاحة كواحدة من الوسائل اللي ممكن تسهل ارتباط اتنين ببعض؟؟ ليه نرفضها من ناحية المبدأ ونقفل باب من أبواب التعارف؟
وليه كمان بنحدها بوقت معين؟؟ ليه البنت والشاب ما يتقابلوش بمعرفة الأهل مرة واتنين وتلاتة ويتكلموا ويتواصلوا لحد ما يوصلوا لقرار؟!
* هرجع تاني أقول لك عشان الموضوع مخاطرة وموقف مش لطيف للبنت!.. وكمان حتى لو تواصلوا مع بعض بهدف التعارف للجواز، ده بيحط ضغط إضافي على الطرفين.. لأنهم مضطرين يبرزوا أفضل ما فيهم حتى لو بافتعال..

غير مثلاً لما شاب وبنت يعرفوا بعض من خلال الشغل ويشوفوا تصرفات بعض على الطبيعة من غير تكلف ولا افتعال!
- مفيش مشكلة.. بس مش كل البنات بتشتغل.. ومش كل البنات بتشتغل في أماكن مختلطة.. وفي قطاع كبير من البنات بترفض الاختلاط لأسباب دينية.. لو احنا نظرنا النظرة الضيقة دي لجواز الصالونات يبقى منعنا عنهم الباب الوحيد اللي في النور!
وبعدين البنت لو استقبلت الموضوع على إنه مجرد وسيلة للتعارف بتسهل علينا وتوفر وقت، افتكر إنها ممكن تاخد الموضوع بصورة أفضل شوية..
وتعليقا على نقطة الوقت، في أميركا مثلاً فيه ناس فعلا مش فاضيين للمناسبات والاختلاط في الدواير الاجتماعية.. وبالتالي اخترعوا حاجات كتير لتسهيل التعارف بين الراغبين في الجواز أو الارتباط.. من ضمن الوسايل دي حاجة اسمها Speed Dating .. مجموعة من الرجالة و مجموعة من الستات في قاعة كبيرة وكل واحد يقعد مع كل واحدة 3 دقايق مثلاً أو 5 دقايق وبعدين ياخدوا قرار عايزين يتقابلوا تاني ولا لأ.. لو إن المسألة مسألة عبيد وجواري بقى،، إيه رأيك في الـ Speed Dating ده؟؟
* أمممم.. مش كل بنت ممكن تفهم الموضوع كده!.. وبعدين كل واحد وواحدة أحرار يعملوا اللي يناسبهم!
- بالظبط!.. يبقى بلاش تعميم بقى!.. السؤال دلوقتي ليكي انتي يارا: يناسبك جواز الصالونات؟؟
* لأ.

- عشان بتشتغلي يعني؟؟
* عشان بشتغل وعشان حاجات كتير.. أنا اعرفك منين معلش يعني عشان أقرر في مقابلة ولا اتنين إني أتجوزك أو لأ؟
- مش مطلوب تقرري نتجوز ولا لأ!..هو إحنا هنتجوز أول ما نقول أوك؟!
*أكيد لأ بس مطلوب مننا قرار هنكمل و نعمل خطوبة ولا لأ!
- مين اللي طالبين مننا ده؟
* أهلك وأهلي أكيد!
- لأ مالكيش دعوة بأهلي أنا كفيل بيهم.. تقدري انتي تطلبي من بابا يصبر على القرار؟؟
* بابا إنسان ذكي وأنا واثقة إنه هيتفهم.. بس وقت أد إيه يعني؟!
- وقت كافي إننا ناخد قرار.. شهر مثلاً؟!

* وأفرض إنك شاب - سوري يعني - مقضيها وداخل طالع بيوت الناس تتعرف على بنات وكل واحدة تقعد معاها شهر؟؟
- الشهر ده هنتواصل فيه بمعرفة الأهل وهنتقابل فيه في وجودهم.. يعني حتى لو أنا لعبي، هتخسري إيه؟؟
*مممم.. المبدأ نفسه!.. وبعدين ممكن أتعلق بيك مثلا وبعدين مايحصلش نصيب!
- انتي بتناقضي نفسك على فكرة!
إزاي بتشتكي من ضغط الوقت وبعدين لما اقترحت عليكي ناخد وقتنا بردو بتشتكي؟!
* مش عارفة بقى!
هو الموضوع كله ملعبك على بعضه!
- ممممم.. وعشان كده الأسهل إنك تتكلمي بعدائية وتطفشيني؟!
* أكيد طبعاً.. واضحة يعني!

- طب اديني ما طفشتش أهو.. بالعكس.. جرأتك وطريقتك في النقاش وقدرتك على التعبير عن نفسك عجبتني جداً..
* وانت كمان طريقتك في النقاش المتحضر غير المتحيز عجبتني بصراحة!..
- الحمدلله.. فاضل بقى نقطة أخيرة..
* إيه تاني؟
- أنا كلت حتة من التورتة وأنا جاي في الطريق.. لأني بحب الشوكلات كيك دي جداااا وكنت طالع من الشغل مالحقتش اتغدى!
*هههههه.. يا ختاااي!.. ماما لو عرفت هتفضحك وتقول عريس مفجوع!.. بس بصراحة أنا كمان بحب الشوكلات كيك أوي.. ف أنا عذراك..
- لأ إن كان كده بقى قومي هاتيها من برة نضربها سوا..

ملحوظة:

التدوينات المنشورة في مدونات هافينغتون بوست لا تعبر عن وجهة نظر فريق تحرير الموقع.