المدونة

نعرض أحدث الآراء و التحليلات لأبرز مدوني هافينغتون بوست عربي

محمد فايق فايز Headshot

بعد ١٠ سنوات زواج.. هذا ما دار بينه وبين سارة زوجته

تم النشر: تم التحديث:

ملحوظة: التدوينة بالعامية المصرية

- سارة.
* أيوة يا أحمد.
- العيال ناموا؟
* أها.. ليه؟
- طب تعالي.
* ليه؟!

- عايزك لمدة ساعة تنسي إنك سارة مراتي وتيجي معايا.. ممكن؟
* يا لهوي يا أحمد خُنتني؟!
- إيه بالظبط ف اللي أنا قلته أوحالك بالفكرة العظيمة دي؟
* ما هو عايزني أنسى إني سارة مراتك ليه؟.. اكيد خنتني وهتقول لي عايزك تسمعيني كأنك واحد صاحبي وتكوني هادية والهري بتاع الرجالة ده!
- أهو أنا عايزك تنسي إنك سارة تحديداً عشان طريقة التفكير الحريمي دي!!
هتيجي ولا مش هتيجي؟!
* هاجي.. أما نشوف!
- البسي طيب وهستناكي ف العربية.
* ألبس؟!.. وعربية؟!!.. أوباااا.. لا ده انت كده اتجوزت بقى مش خنتني بس!!

اتجوزت عليا يا أحمد؟!
- قسماً بالله لو ما سكتي ودخلتي تلبسي وكنتي ف العربية كمان ١٠ دقايق، هتجوز الـ3 اللي فاضلين لي ف خلال أسبوع!
* ماشي يا أحمد.. أما أشوف!

- - - - - - - - - - - - - -

* * ف العربية* *
* ها؟.. فيه إيه؟
- انسي إنك سارة مراتي الأول.
* أيوة يعني أعمل إيه؟.. أقلع الدبلة يعني ولا أعمل إيه؟!
- لا، يعني تحرري عقلك من روتين الجواز وقوالب الزوجات وغباء المحشي والبيتزات وميكانيكيات الجري ورا العيال بالشبشب ف الشقة.
* انت لما بتطلب معاك فلسفة كده بتبقى عملت مصيبة أو ناوي تعمل مصيبة!
أنجز، هببت إيه؟!!
(بيقف بالعربية)
- انزلي

* خلاص خلاص.. هسكت.
اديني نسيت إني مراتك.. قول يا فيلسوف!
- فاكرة لما كنّا مخطوبين؟
* أيوة فاكرة!.. ها؟
- طب فاكرة إحنا بقالنا أد إيه متجوزين؟
* عشر سنين.. فيه إيه يا أحمد؟!
- من وقت الخطوبة لحد دلوقتي، عشر سنين، إحنا فين يا سارة؟
راحت فين لهفتي عليكي؟.. راح فين حبي ليكي وسعادتي لما كنت أبص ف وشك؟؟.. راح فين شغفك واهتمامك لما كنت أقعد أكلمك عن حاجة وانتي بتسمعي لي بمنتهى الاهتمام؟؟
راح فين اهتمامك بشعرك وجسمك وإكسسواراتك؟
راح فين البووت الشمواه اللي كنت بتهبل لما أشوفك لابساه؟
* عايز توصل لإيه يا أحمد؟!

- أرجوكي جاوبي على أسئلتي.. أنا حاسس بملل رهيب.. حاسس إني مش متجوز.. روتين حياتنا خانقني!..
ومش عارف أعمل إيه!.. ومش عارف أكلمك!..
كل ما أفتح الموضوع معاكي تهربي!
* عايز تعرف يا أحمد؟؟
- أيوة عايز أعرف!
* مبدئياً البووت الشمواه رميته من خمس سنين بعد ما خلفت نهى لأنه داب وما كانش ينفع ألبسه.. وما اشتريتش تاني عشان الفلوس إحنا أولى بيها ف مصروف البيت!
إكسسواراتي مرمية في درج الشوفينيرة ماليش نفس ألبسها عشان عينك ما بقتش تشوفهم خلاص!..
شعري محتاج وقت وروقان بال عشان أهتم بيه زي الأول..
والوقت اللي ههتم فيه بشعري ده، البيت وعيالنا أولى بيه عشان مش هنقدر نجيب شغالة!
جسمي باظ بعد 3 ولادات قيصري!.. اللي هما عيالنا يا أحمد!..
ومحتاج عمليات شفط دهون واشتراك نادي وSpa ودكتورة تغذية و..... و......و ......
- يا سارة بس الـ.........

* أما بالنسبة للملل اللي حضرتك حاسس بيه، أنا حاسة أضعافه!..
ما بين شغلي وشغل البيت والطبيخ والغسيل والمواعين والمذاكرة للعيال وتدبير مصروف البيت والجمعيات بتاعت مصاريف المدارس والاجتماعيات اللي حضرتك راميها عليا كلها، أنا نسيت أساساً إني متجوزة.
- ماشي أنا عارف كل ده بس بر...........
* اللي انت وكل الرجالة مش فاهمينه إن الست بتتغذى حرفياً على الاهتمام الصادق من جوزها وراجلها!
آخر مرة قلت لي تسلم إيديك على أكلة قطمت ضهري ف المطبخ عشان أعملها لك إمتى؟؟
آخر مرة قلت لي أنا بحبك يا مراتي يا أم عيالي يا اللي جسمك باظ وسنانك اتسحب منها الكالسيوم بسببهم كانت إمتى؟؟
آخر مرة لاحظت إني حوشت واشتريت البرفيوم اللي انت بتحبه وحطيته واستنيتك كانت إمتى؟
وانت جيت فضلت تتفرج على ماتش برشلونة!
- لأ بقى كله إلا برشلونة!!
* هي برشلونة بس؟

والأهلي وريال مدريد والإنتر وماتشات اليد والأخبار والقعاد على النت وأصحابك ع القهوة والجرايد والشغل و...... و...... و......و......!!
- انتي عرفتي أسماء النوادي دي منين؟!
* ههههههه.. لأَنِّي مهتمة!!
مهتمة أعرف جوزي بيحب إيه!
- وكاتمة ف قلبك كل ده!!
* كاتمة عشان ما بقاش سارة النكدية الرغاية اللي مش مقدرة تعب جوزها ومزاجه!!
- (نظرة صامتة).. بس أنا........
* بس انت إيه؟
أقول لك أنا؟

بس انت راجل..
مش مستوعب إن الاهتمام بمراتك هيفرز ف جسمها هرمونات سعادة تخليها أجمل من كل الموديلز!
انت راجل وطبعك أناني مش هتشوف ولا هتحس غير باللي يروق مزاجك انت وبس!!
انت راجل واختصرت حياتك الزوجية ف كارت البنك بتاع المرتب و١٠ دقايق ف السرير كل أسبوع!!
انت راجل والتصميم بتاعك متعارض مع مجرد الفهم لـ إزاي تاخد بالك من مراتك إلا ف أول 6 شهور جواز وهي لِسَّه بخيرها قبل ما الزمن والخلفة والمواعين والمطبخ يعلموا عليها!!
- كل ده!!!.. ده انتي معبية وشايلة مني قوي!!
* لا يا حبيبي مش شايلة.. أنا تصالحت مع كونك راجل من زمان!!..
- طب غمضي عينك!
* هههههههه.. إحنا ف الشارع!
- غمضي بس!
وما تفتحتيش غير لما أقول لك!
* ماشي بس بلاش تهور مش طالبة أقسام على آخر الزمن!
(سارة بتغمض عينيها)

* ها؟؟؟
كل ده؟؟
- فتحي بقى!
* إيه ده؟.. إحنا فين؟؟
- فاكرة بتاع العصير ده؟؟
* أيوة فاكراه!
ده أول مكان خرجنا فيه بعد كتب كتابنا!
- وجينا هنا أول مرة زي النهارده من ١١ سنة بالظبط!
* وانت لِسَّه فاكر؟ ههههههه
- أيوة فاكر!..
وعارفة فاكر إيه كمان؟؟
* إيه؟
- إنك يوميها كنتي لابسة البووت الشمواه!
(أحمد بيمد إيده للكنبة اللي ورا ويجيب شنطة)
* إيه ده؟؟
- افتحيها!
(سارة بتفتح الشنطة اللي جواها بووت شمواه جديد وكان على مقاسها بالظبط!).

ـــــــــــــــــــــــــــ

الاهتمام بالزوجة ممكن يكون أحسن من كل أدوات التجميل الفرنسية والسويسرية اللي ف العالم!
الاهتمام بالزوجة اللي طفحانة مرار معاك ومع عيالك ممكن ما يكلفكش غير مفاجأة بسيطة كل فترة!
الاهتمام بالزوجة ممكن ما يكلفكش غير فكرة بسيطة انت عارف إنها هتفرحها!!
الاهتمام بالزوجة ممكن ما يكلفكش غير نص ساعة ف العربية أو الميكروباص.... وتمن بووت شمواه!

ملحوظة:

التدوينات المنشورة في مدونات هافينغتون بوست لا تعبر عن وجهة نظر فريق تحرير الموقع.