المدونة

نعرض أحدث الآراء و التحليلات لأبرز مدوني هافينغتون بوست عربي

محمد صلاح أبوسعدة  Headshot

طلاق الملتزمين!

تم النشر: تم التحديث:

ملحوظة: التدوينة بالعامية المصرية

نسبة الطلاق عالية جداً وغريبة، لكن الناس بتستغرب من زيادتها بين الملتزمين، ومستغربين إزاي ملتزمين ونسبة الطلاق عالية كده، الجماعة بتوع ربنا بيتطلقوا همّا كمان!
بص يا سيدي المشكلة فين..
الأخت نقابي سر حيائي، وأم الحارث السلفية الجهادية الأفغانية الاستشهادية، لما بييجي يتقدم لها شخص ملتزم يتجوزها بتروح مسكاه هارياه لِسْتة الأسئلة دي:
- حافظ كام من القرآن، معاك إجازة في أي القراءات؟
- حافظ كم من الكتب الستة؟
- معاك إجازات وتزكية من مين من المشايخ؟
- لو طلبوك للجهاد يوم الصباحية هتلبي منادي الجهاد ولّا لا؟
- هتعمل حلقة تعليم وشرح صحيح البخاري ومسلم في المطبخ يومياً ولّا لا؟
- ما هي المجلدات عندك في مكتبتك في البيت؟
- المكتبة بتاعتك كام دور؟ وما هي أسماء المجلدات اللي عندك؟


فيه أسئلة من دي مهمة وجميلة، طيب حضرتك سألتيه عن أخلاقه، عن طباعه، عن عاداته، عن بره بأبوه وأمه؟ سألتِ أصحابه عن طباعه؟ سألتِ زمايله في الشغل عن طباعه ومعاملاته؟
- لا.. أصل دي كلها أمور دنيوية.

* يبقى ما تجيش تشتكي بقى منه لما يطلع قليل الأدب وعديم الأخلاق، وبيمد إيده عليكِ، وبيعامل أهلك وحش، وبخيل، ومهمل، ومنيل بستين نيلة.
أصل دي كلها أمور دنيوية يا أخت أم الحارث!

والأخ أبو المقداد الجهادي الشيشاني وأبو قتادة الدرعمي الحنبلي لما يروح يتقدم لأخت ملتزمة بيسألها الليستة المعروفة عند المحزلقين:
- حافظة كام من القرآن؟
- قرأتِ إيه في الكتب الستة؟
- قرأتِ كتاب الزفاف للألباني؟
- إيه رأيك في التعدد؟
- أنا عايز أخلّف عشرين عيل قه قه قه قه!
- هنروح نجاهد في شهر العسل في أفغانستان ولّا لا ونترك الدنيا الزائلة؟
- هتصحيني لقيام الليل بالميّة الساقعة هع هع هع هع أمزح يا أختاه!
- لو ما كانش معايا فلوس ومفيش أكل وميّة ستصبرين على متاعب الدنيا الفانية؟


طيب تمام جداً بالنسبة حضرتك لاستعدادها إنها تكون زوجة وأم؟ اهتمامها بالبيت؟ أخلاقها وتعاملاتها؟ صوتها عالي ولّا لا؟ مؤدبة وبتحترم الأكبر منها ولّا لا؟ أهلها عاملين إيه وتعاملاتهم إيه؟ سألت الجيران والمعارف عنهم وعنها ولّا لا؟
- لا يا أخي هذه دنيويات المهم الزوجة الصالحة!
* طيب تمام ما تجيش بقى تشتكي إنها ما بتعرفش تطبخ ومهملة في البيت ومش نضيفة وصوتها عالي عليك ولسانها طويل ومش بتحترم أهلك..

جميل قوي إننا نهتم بالدين، لكن ما ينفعش دين من غير دنيا ولا أخلاق، ما ينفعش واحد من غير التاني.. الاتنين لازم يكونوا موجودين علشان يكون فيه توازن..

ملحوظة:

التدوينات المنشورة في مدونات هاف بوست لا تعبر عن وجهة نظر فريق تحرير الموقع.