المدونة

نعرض أحدث الآراء و التحليلات لأبرز مدوني هافينغتون بوست عربي

مونيكا جميل Headshot

العيب على السائق.. أحياناً

تم النشر: تم التحديث:

التدوينة باللهجة العامية

درجاتي في المدرسة كانت بتبقى عالية لحد ما وصلت ثانوية عامة.. حاجات كتير اتغيرت من وقتها وبدأت درجاتي تقل.. إحساس صعب ومتعب إنك تحس بالفشل.. وإن كل أصحابك اللي حواليك ناجحين وإنت الفاشل اللي فيهم..

بس الأصعب منه بالنسبة لي إنك تحس انك غبي وتبدأ تقتنع فعلاً إنك غبي، وإن مكانك مش في حصص الفيزيا والرياضة.. لمجرد إن المُدرس بتاعك شايفك كده.. شايفك غبي ومتخلف.. شايف إن دماغك وتفكيرك محتاجين مدرسة خاصة للمعاقين ذهنياً..

كنت ساعات أسأل أسئلة خارج المنهج.. وأسئلة ممكن تكون غريبة ومضحكة أو مالهاش لزمة.. لكن كل هدفي منها إني عايزه أفهم وأقتنع..

ومن هنا بدأ يحبطني ويقول إني غبية.. كرهت المادة.. وكرهت الملازم والكتب.. وبطلت أسأل وأفهم.. وبطلت أذاكر كمان.. ومستوايا كان بينزل في باقي المواد.. والموضوع يتطور لدرجة إن أسهل سؤال مكنتش بعرف أحله عشان اقتنعت إني غبية وخلاص مفيش أمل مني..

دخلت الامتحان.. كتبت أي كلام.. ظهرت النتيجة وكل الدرجات زي الزفت وجنب الفيزيا مكتوب راسب.. ساقطة !!..ملحق !!..دور تاني..

كلمات كنت بسمعها لكن الوقت ده كنت عايشاها أوي.. في البداية كنت مستسلمة جداً.. وبسبب تشجيع اخواتي واصحابي بدأت اذاكر تاني.. خلاص الامتحان بعد شهر.. ودي فيزيا مش تربية وطنية!!..كانت الفيزيا اكتر حاجة بخاف منها بعد ربنا تقريباً..

أخدت درس مع شخص محترم.. كان بيشجعني وبيشكر فيا.. والغريبة إنه قال إن دماغي كويسة وإني ذكية..!!

وفي خلال الشهر ده كنت باخد كورس بيانو الى جانب المذاكرة للملحق.. صديقتي تجيلي البيت شوية تفهمني حاجات.. تحل أسئلة معايا.. أحل اسئلة وأشوف إجاباتها وأبقى في قمة الفرحة لو إجابتي صح..

كان شهر حلو رغم الضغوط ووزني اللي نزل فيه جامد.. إتعلمت فيه إني مهما اتقال عليّ لازم أكون واثقة في نفسي.. واتعلمت اني متأثرش بأي كلمة سلبية..

دخلت الامتحان.. حليت كويس وبثقة.. ظهرت نتيجة الدور التاني وجبت درجة عالية في الفيزيا.. بس طبعاً مخدتش غير النُص.. لكن فرحت عشان أخيراً أنا اتأكدت إن العيب مش في العجلات ولا في العربية.. العيب في السواق نفسه!! وإن لو كان في حد غبي في القصة دي فهو بالطبع المُدرس..

أنا كسرت حاجز الخوف.. ومبقتش أخاف غير من ربنا بس.. #الفشل_علمني إن من غيره عمري ما هنجح أو أتعلم.

ونصيحة من فاشلة قديمة:
-خليك واثق من نفسك.. إنت تقدر تعمل أي حاجة..أي حاجة بجد..
-امسك في الناس اللي بتشجعك دايماً وسيبك من التانيين دول..

ملحوظة:

التدوينات المنشورة في مدونات هافينغتون بوست لا تعبر عن وجهة نظر فريق تحرير الموقع.