المدونة

نعرض أحدث الآراء و التحليلات لأبرز مدوني هافينغتون بوست عربي

مريم أحمد كامل Headshot

الست المصرية نكدية

تم النشر: تم التحديث:

ملحوظة: التدوينة بالعامية المصرية

سلامه عليكو، مساء الخير، باين طبعاً محتوى الكلام هيكون عن إيه، أو بمعنى
أصح هيكون عن مين، طيب أنا واحدة من اللي هحاول أتكلم عنهم فأتمنى ربنا يقدرني وأعرف أوصل المعلومة صح.. أقصد الست مش الست النكدية.

ليه ما بنسمعش البنت المصرية نكدية؟ ليه دايماً الكلام بيبقى عن الست؟ يعني مثلاً مفيش أب بيقول لبنته في خناقة إنتي نكدية!
ولِمَ العجب؟ البنت بعد ما تتجوز ويبقى ليها بيت لوحدها مش بيت هي جزء منه مسؤوليتها بتزيد.. واهتماماتها وتفكيرها أحياناً.

كل إنسان عنده عيوب ومميزات، ما ينفعش نغمة التعميم السائدة بأن الست المصرية نكدية والست الهندية بترقص هندي طول النهار والجو ده!

محدش ينكر إنه فيه ستات نكدية فعلاً وعند كل واحد في عيلته ممكن نلاقي واحدة أو اتنين بس بردو ده مش مقياس إننا نعمم..
ممكن أتكلم شوية عن الستات اللي مش نكديين وبيتفهموا غلط؟

الست اللي بتفكر كتير وبتفكر في التفاصيل يختاااااي يعني هي أولاً بتنكد على نفسها، والله العظيم، لأن التفكير الزيادة مش هيحل المشكلة ولا هيسرع الحل ولا هيخلّي المرتب ينزل بدري مثلاً.. فلما ييجي جوزها يسألها ما لك وتقوله مفيش، وهي باين على وشّها إن فيه ونص.. هي بس مش عايزة تحكي له، تخيلت إيه وإن تفكيرها وصل لإيه.

نيجي للنوع التاني بقى الست اللي بتبقى شايلة المسؤولية بزيادة شوية وتقعد تحسب كل حاجة جابتها بكام طب هكلفه كتير، طب بلاش، لأ بس أنا محتاجاها طب هجيبها، فتجيبها وتزعل بقى إنها كلفت جوزها مثلاً وهما داخلين على مدارس والعيال والذي منه.. فيقوم هو يستغرب إيه الست العجيبة دي ما هي اشترت اللي نفسها فيه أومال ليه قالبة وشّها؟! (أظن عرفت دلوقتي).

وفيه نوع اللي هو الحساس شوية ممكن تشوف بوست على الفيسبوك عن أي حاجة سيئة فيها ظلم أو أو.. واليوم ما يكملش عادي، لأ تفضل الحاجة دي مضايقاها ودي حاجة ما تقدرش تتحكم فيها هو ربنا خالقها كده.

وفيه ستات النكد فعلاً عندهم هواية بدون مبرر وبدون منطق.. فدول أنا أقول عنهم نكديين وأنا ضميري مرتاح ومتأكدة مية في المية.

وفي النهاية عزيزي الزوج مفيش واحدة هتحب تزعل نفسها بالعافية، أو من غير سبب، ودايماً احتسب لوجه الله إنك تبتدي تصالح؛ لأن فعلاً الستات عبيطة جداً ممكن تتصالح بوردة بلاستيك من أي كشك متواضع أو حتى ورقة تقطعها، وتكتب عليها كلام لطيف..(ما عدا النكدية فعلاً) بس كده اتّثبتت واتصالحت بربع جنيه.

ملحوظة:

التدوينات المنشورة في مدونات هاف بوست لا تعبر عن وجهة نظر فريق تحرير الموقع.