المدونة

نعرض أحدث الآراء و التحليلات لأبرز مدوني هافينغتون بوست عربي

لقمان ديركي Headshot

تعال إلى حيث النكهة.. هنا سوريا

تم النشر: تم التحديث:

تعال إلى حيث النكهة، تعال إلى سوريا، هنا منبت البشرية الآن، مو من زمان، كانت بلد بدون تسماية، شغلة مو متفق عليها، بس متفق عليها مظبوط، يعني متروكة للألله وتوكلنا، وأنت بتعرف أنو الألله وتوكلنا تبع كل واحد هي غير ألله وتوكلنا تبع التاني، كل واحد بسوريا عنده أجندة، بس لا تفكر أنو كل واحد مرتبط، لأ، في مرتبطين، وفي مين موالهن من راسهن، وسلامة راسك باستشهاد ابن عمك، نسيت أباركلك عَ الفيسبوك يا أبو شريك، بصراحة كنت محظور، حظروني الأنجاس، بلغوا على حسابي، آاه .. ما عندك فيسبوك؟ إيوة، إي سيدي نيالك على كل حال شو بدك بوجعة هالراس، ناضلنا واندبحنا عالفيسبوك بس كله عالفاضي، ما نابنا شي، ما عاد جبنا لايكات حتى، سبينا عالنظام، هلكناه لبشار بالبوستات والصور الكاريكاتورية، لك دبحناه دبح، من الوريد للوريد، بس ابن حرام ما بيحس، ولا كأنو الحديث عنه، يا أخي مريض نفسياً هاد، لا ولو؟ بشرفك؟ لك إي .. وطلع عنه تقارير بلندن، يا سيدي أبطال أنتو كشفتوا الموضوع، يا سيدي فوتاتكن قوية، لك ليش الثورة ما بتستفيد منكن آه؟ لا تشكيلي ببكيلك، لسه كل واحد حامل لي سلاح وعم يدمر ثورتنا السلمية دد عفواً ضد بشار .. طلعت معي عفوية يخرب بيتها، الدد؟ بالعكس معبرة أكتر، لأنو حاج بقى نستخدم لسان الداد، عفواً الضاد، يخرب بيت العرب شو تلعوا أندال معنا، لأ وما بتسترجي تسبهن مشان ما يشمتوا الأكراد فينا، قال شو ما بدهن إيانا نقول عنهن أكراد، قال لازم نقول كورد، هلأ أنا بكل بوستاتي بقول كورد، وكل المثقفين الأكراد عفواً الكورد بيحتوا لي لايكات على سُوَري، هل تعلم أنو عندي ألف صديق كوردي عالفيسبوك؟ وتلات أرباعهن نفرات، وفي شي عشرة بعتوا لي لم شمل، بس أنا ما بدي أترك الوتن، معليش بتحمل الهاون، بتحمل البرميل، ما بدي أدوق ذل الغربة، الغربة؟ لا تحكيلي عن الغربة، الله وكيلك ما حدا بيعرف حجم المذلة بدون مكدوس، بدون زعتر، بدون لبنة، بدون حمص، بدون كباب، بدون عرق، بدون مخلل، اندبحنا بدون مخلل، أنو كان شي تاجر أخو محلوشة انتهازي صياد فرص يفتح معمل مخلل بأوربا؟ إييييييييييييه وين أيام الوطن؟ وين أيام بوز الجدي ومطعم المحبة، وين أيام أبو هيثم والروس واللسانات والسجقات، وييييين أيام أبو حسن والفول بطحينة والفول بحمض، وييييين أيام أبو عبدو الفوال، ستوب ستوب ستوب، لا تجيب لي سيرة أبو عبدو، قسفوا له محله البجم النِّزام، مع أني مو من حلب بس ما بيهون علي يقسفوا أشهر محل فول بحلب، ووين؟ بالجديدة، بالحارة القديمة الأثرية، يعني شو موقف اليونسكو برأيك من قسف محل أبو عبدو الفوال؟ ولا حَرَّكوا ساكن، ولا كأنو القسف سار بحارة أثرية قديمة، للأسف ما اهتموا حتى بزنوبيا، تخيلي، لك بزنوبيا ما اهتموا، آاااخخخخخ رح أجن من هالعدو المتآمر، ما شفت عدو تآمر علينا قد الغرب، يخرب بيتهن، لأ ومع مين مع حكامنا، لازم نفدحهن حبيبتي، يفدح عردهن حبيبي، استقتلِّكْ.. عفواً اشتقتلِّكْ، كبست عالأس بدل الأش، هههههههههههههههههه، حبيبي، تؤبر ألبي، بعيد الشر عنك حياتي، دوبتيني، إي دوب حبيبي دوب، دبت حياتي دبت، بس هالإتفاقية النووية شغلت لي بالي حبيبي، معقولة ندفع الثمن؟ آااخ شوفي البوست اللي كتبته من شوي، فدحتهن حياتي، هنن وهالمسخرة، هاد أوباما واحد تانت حبيبتي، رجّال حبيبي رجّال، كل عمري بقول عنك أنو مخك بيوزن بلد وقلبك قوي حادر، ما بنسى الستاتوتس اللي كتبته عن جسر دير الزور المعلق، وبوستك عن نواعير حماه المجزرة التي تتكرر، وعن أردوغان إلي ما بده يسمح بحماه تانية، أردوغاني مكشوف، شو به أردوغان؟ لا لا تغلطي حبيبتي، أردوغان حبيبنا ومعلمنا واللي ما عجبه يطلع برة تركيا، البلم بيوسع جمل، لكان واللي ما عجبته أوربا وقوانينها كمان يطلع لبرة، يرجع لحضن أردوغان، هلأ ما بدنا نختلف حبيبتي، يعني شو بدنا أحلى من النموذج التركي؟ ليش شو به النموذج الغربي؟ وإلا ما بيصير بلا دقن وشوارب، على راسي شواربِكْ يا أختي، بس فوق ما حويناكن بتركيا، والله لو استلموا جماعة أتاتورك لحتى يقلّعوا السوريين متل ما عمل السيسي بعد ما غدر بمرسي، أتذكرين عندما طردونا من مصر أتذكرين؟ لا والله متذكرة لما طردونا من لبنان، صار فينا متل الفلسطينية، إي لا بقى تحكيلي عن الفلسطينية، تلعوا عم يدربونا يعني عم يضربونا بسيفهن حبيبتي، الأنزمة التوتاليتارية، بحبَّك حبيبي، يا ألله شو بتفهم، يا ألله شو بتفهمي، بموت فيكْ، بموت فيكِ. شو كانت هديك الكلمة حبيبي؟ توتاليتارية،.. تقبر قلبي، بعيد الشر حياتي.