المدونة

نعرض أحدث الآراء و التحليلات لأبرز مدوني هافينغتون بوست عربي

لبنى عصام حشيش  Headshot

في بويضة بتنفجر في بطني يا عالم!

تم النشر: تم التحديث:

ملحوظة: التدوينة بالعامية المصرية

ليه الناس بتعتبر إن الكلام عن الـ"period" أو الإفصاح عن إن واحدة ما بتصلّيش حالياً علشان عندها البيريود قلة أدب أو وقاحة؟!

أنا مش بفهم الموضوع ده خاااالص! أنا شخصياً اتربيت على كده، وكنت بتكسف جداً وأُحرج من إني أتكلم أو أقول كده قدام حد، بس لما كبرت شوية بقيت حاسة الموضوع من السخافة إنه يتحط في التابو ده!

حاجة علمية بحتة، ومتكررة شهرياً! وبتيجي لكل بنت وست خلقها ربنا في الكون! وربنا عاملنا وأعفانا من الصلاة والصوم علشان التعب والألم اللي بنبقى فيه، وهرموناتنا بتبقى متشقلبة، ومودنا متغير وحالنا بَلا!
بس ما نقولش وما نعبرش ونداري كل التقلبات المزاجية دي واللي قدامك يقول لك ما لك؟ تقولي مفيش، ويمشي متخيل إنك متخلفة عقلياً علشان متضايقة من حاجة غير منطقية أو مش فاهم أصلاً هو عمل إيه علشان تقلبي عليه، في حين إنك مش قالبة عليه ولا حاجة، بس هي هرموناتك اللي جايلها الجنان في دماغها!

بنحتاج نرتاح أول يومين فيهم علشان الألم، وفي ناس بيبقى ألمها شديد لدرجة إنها تاخد حقن مسكنة!

تخيلوا معايا كده بويضة بيحصل لها انفجار في الرحم.. الواحد بيبقى بيعض في الأرض من الوجع أصلاً!! أنا شخصياً أول يومين دول ببقى متكعورة في السرير وبسف المسكنات زي المدمنين! ولو حظي جابني وكنت في الشغل أول يوم ما بتيجي ببقى متكعورة برضه بس على أرض في الستاف رووم وبسف برضه أي مسكنات تقع تحت إيدي علشان أقدر أواصل اليوم لحد ما أروح بيتنا!

بيبقى أسبوع جميل من العصبية والمود الوحش والألم والهبل وساعات الفجع والعياط على أي حاجة مستاهلة أو مش مستاهلة، أنا بعيط لما بشوف إعلانات البامبرز علشان بيصعب عليا إن العيال بيعيطوا فيها! "عادي جداً ولا أي اندهاش".

فى مِثل هذا الوقت السعيد من الشهر تلاقي اللي مخطوبه وبتحب خطيبها فجأة مش طايقاه وهاين عليها ترمي له الدبلة في وشه، واللي متجوزة ومخلفة لا طايقة العيال وواقفة لأبوهم على كل كلمة وعايزه تولع في البيت، واللي بتشتغل لو مديرها صبح عليها ببواخة ممكن تقدم استقالتها عادي جداً وتسيبها لهم مخضرة!

فيا شعب ارحمونا من تابو إنه عيب نقول إن عندنا البيريود علشان ده شيء لا هو عيب ولا حرام ولا غلط، ده شيء في تكوينا الجسماني كسيدات وبنتمرمط بسببه، فأضعف الإيمان إنكم تراعوا حالتنا النفسية والجسمانية ساعتها، وتستوعبوا التقلبات المزاجية غير المبررة وتجيبوا لنا أكل كتير وتختفوا من وشّنا لحد ما الأسبوع يعدّي!

إضافة مهمة:
معلومة حد من صحابي الدكاترة عدّلها لي إن ألم البيريود بيبقى بسبب إن الرحم كل شهر بيعد نفسه إنه يستقبل بيبيى بأنه يعمل 3 طبقات كجدار للرحم وتبدأ الـlayers دي تكبر، فلما ما تستقبلش حاجة والشهر بيعدي، بيبدأ الرحم يتخلص من طبقتين منهم ويحتفظ بالأولى بس علشان بيعيد العملية تاني الشهر اللي بعده.. وإن في بويضة بتنفجر فعلاً بس مش في الرحم، إنما في المبيض، وده بيكون في نص الشهر، وإحنا مش بنحس بيه قوي، ممكن ألم بسيط.

"وده أكبر دليل على التابو اللي بتكلم عنه، إن أنا البنت اللي بيحصل لي كل ده وما أعرفش حتى المعلومة الصحيحة للي بيحصل علشان محدش بيتكلم عنها ولا بيفهمنا حتى فيه إيه!".

أنا بعتذر عن جهلي لكل الناس اللي علقت على موضوع انفجار البويضة.. أنا فعلاً ما كنتش عارفة.

ملحوظة:

التدوينات المنشورة في مدونات هاف بوست لا تعبر عن وجهة نظر فريق تحرير الموقع.