المدونة

نعرض أحدث الآراء و التحليلات لأبرز مدوني هافينغتون بوست عربي

خالد شريف الفار Headshot

9 اختلافات بين مساجد تركيا ومساجد العرب

تم النشر: تم التحديث:

ملحوظة: التدوينة بالعامية المصرية

مفارقات وجدتها في مساجد تركيا ومساجدنا في الدول العربية ومدى الفهم لثقافة المسجد وحرمته وحاجات تانية كتير..

الأذان:

- تركيا: المؤذن (لازم) يكون نديّ الصوت فاهم في المقامات والترتيل.. وكل أذان بطريقة غير الأخرى علشان الكفيف يعرف ده أذان أي صلاة.
- الدول العربية: في الأغلب جورج وسوف متكرر ومستنسخ على كافة مساجد الإقليم العربي (مصر - دول الخليج) بالأخص.

رص الأحذية:

- تركيا: مهما كان عدد المصلين في المسجد -أو خارجه- فيه جزّامات ومكان لحذاء كل مصلي وكيس مخصص لكل مصلي يحط فيه حذاءه، ولما يخرج من المسجد فيه حاوية لرمي الكيس.. وعلى فكرة الكيس مجاني.
- الدول العربية: فيه جزّامات تكفي لمصلي الصف الأول والباقي يصطفل.. لو كنت رايح تصلي بحذاء غالي كبّر عليه ثلاثاً.. فإما هتلاقيه مدهوس أو في مكان تاني خالص من كتر المطوحة... أو مش موجود خالص.

احترام حرمة المسجد:

- تركيا: المسجد للصلاة.. تعظيم شعائر الله عندهم شيء كبير جداً.. لو فيه حد نايم أو متكئ في المسجد معروف عندهم إنه عربي.
- الدول العربية: لا تعليق.

الصف الأول:

- تركيا: اللي بييجي الأول بيحجز المكان اللي هو عاوزه، ويصلي فيه بكل أريحية حتى لو خلف الإمام مباشرة.
الدول العربية: ممكن لو جيت قبل الأذان نفسه بنص ساعة تلاقي الصف الأول بالكامل محجوز لناس غريبة وممكن يكونوا ميتين أصلاً.

ولا الضالين "آمين":

- تركيا: آمين بتتقال في السر.
- الدول العربية: الجهر بزيادة.

المتعلقات الشخصية:

- تركيا: مفيش أي حاجة بتبقى قدام أي مصلي أبداً.
- الدول العربية: من شروط صحة الصلاة وجود موبايلين -أو تلاتة- مع محفظة وسلسلة مفاتيح مأمور سجن العقرب.

الأمراض الصدرية:

- تركيا: ما سمعتش في 3 سنين واحد مرة كح أو عطس في الصلاة.
- الدول العربية: حاجات غريبة بتحصل والله.

الجوارب (الشرابات):

-تركيا: لازم تلبس شراب وانت بتصلي.
- الدول العربية: الواحد عرف قيمة شرابات تركيا ولا داعي للتفصيل.

السرعة في أداء الصلاة:
- تركيا: كريستيانو رونالدو.
- الدول العربية: سيد معوض.

ملحوظة:

التدوينات المنشورة في مدونات هاف بوست لا تعبر عن وجهة نظر فريق تحرير الموقع.