المدونة

نعرض أحدث الآراء و التحليلات لأبرز مدوني هافينغتون بوست عربي

إبراهيم المصري Headshot

إذا أردتَ الاستقرار في تركيا.. هذا كل ما يجب أن تعرفه

تم النشر: تم التحديث:

ملحوظة: التدوينة بالعامية المصرية

بمناسبة أن هناك إقبالاً غير اعتيادي على ترك الخليج بشكل عام، و"السعودية تحديداً"، والتوجه لتركيا، حابب ألفِت نظركم لكام نقطة عشان تكونوا على بصيرة قدام أي إعلان أو معلومة مغلوطة، سواء اتقالت "بقصد أو بدون قصد".

- مفيش حاجة اسمها تاخد الجنسية لو اشتريت عقاراً أو استثمرت في تركيا، والأمر فيه شروط تعجيزية.. عايز تاخد الجنسية اتجوز/ي تركي/ـة، أو يكون ليك أصول تركية غير كده ريَّح بالك.

- ما تخليش حد يعملك من البحر طحينة ويقولك لازم تشتري أو تستثمر عشان تطلع إقامة.

الإقامة بتطلع من غير شراء ولا استثمار، بمجرد ما بتحط رجلك في تركيا بتمشي في إجراءاتها، وبتطلعلك بعد متوسط شهر، وصلاحيتها من 9 شهور إلى سنتين، حسب صلاحية باسبورك.

- الإقامات كلها شَبَه بعضها، ومفيش فرق ما بينها "سياحية، عقارية، استثمارية" كله واحد.. إلا إقامة العمل.

- مفيش شغل مستنيك في تركيا، ومحتاجينك ومفيش غيرك، إلا لو كنت جاي بناءً على دراسة جدوى من أصدقائك الثقات "جداً"، أو جاي على وظيفة بإيميل رسمي عشان ما تلبسش في الحيط.

- لو جاي إنت وأسرتك اعرف إن متوسط مصاريف أول شهر لو معاك طفلان مثلاً أول طلعة بمصاريف الإقامة + إيجار الشقة "التأمين والمقدم والعمولة والعفش وفتح الكهربا والغاز" + أكلك وشربك + مواصلاتك.. "بنقول أول طلعة" هتكلفك متوسط من 4000 إلى 6000 دولار، وبعد كده شهرياً مصاريفك هتكون بمتوسط من 500 دولار إلى 1000. "الأرقام دي تقريبية حسب مستوى المعيشة اللي إنت هترتاح فيه وهتختاره وهي أقرب للواقعية".

- أنا ما حسبتش تذاكر طيران ولا إجراءات ومصاريف التأشيرة اللي من بلدك دي ضيفها لحساباتك برضه.
لو بتفكر تيجي تركيا اعمل حسابك في Pocket money لمدة سنة قدام من غير عائد مادي.. اعتبر نفسك فاتح مشروع ومش منتظر منه ربح قبل سنة.

الأمر يطول فيه الكتابة والشرح وتفاصيله أكبر، ولا أدعي أني خبير بشؤون الحياة في تركيا، لكن إقامتي سنة وشهرين في تركيا كفيلة بمعرفة ما لا يسع للمقيم في تركيا جهله.

بالإضافة لذلك وصلني من أكتر من صديق يسألني في المحاور اللي اتكلمت فيها دي، فقلت أحطها هنا عشان أكبر قدر يقدر يشوفها.

ملحوظة:
التدوينات المنشورة في مدونات هاف بوست لا تعبر عن وجهة نظر فريق تحرير الموقع.