المدونة

نعرض أحدث الآراء و التحليلات لأبرز مدوني هافينغتون بوست عربي

إبراهيم بهاء الدين Headshot

"الزمالك خد الدوري"

تم النشر: تم التحديث:

"We are the Champions"
"تعالى أعلمك تشيل الدرع إزاي"

أحب أقولك إن اللي هتقرأه دلوقتي ملوش علاقة بالكورة نفسها.. هو ليه علاقة ب الكورة ك أداة.

في نظرك ممكن تكون الكورة مش مجرد رياضة؟
ممكن الكورة تكون ليها استخدام آخر خارج الملعب؟
إحنا ك مصريين نحب الكورة قوي..أكتر من أي حاجة.

طيب هل إننا نحبها "أكتر من أي حاجة" ديه حاجة إيجابية ولا سلبية؟..أنا بصراحة شايفها سلبية.

عمرك فكرت في إن الكورة ممكن تبقى أداة.. مش مجرد لعبة وخلاص؟
الرياضة المسماه بالكورة تحولت الفترة اللي فاتت من مجرد لعبة لحاجة أكبر بكتير.. بقت أكتر من كونها حاجة بتتلعب في الملعب للترفيه وخلاص.. لأ الكورة بقت "انتماء".. تلاقي حد بيشتم فريق معين.. يروح قايم واحد تاني وهو في قمة الغضب "إزاي تشتم فريقي" كأنه شتمه بأبوه وأمه مثلاً.. لا أعتقد إن لو حد سب الدين قدامه كان هيتضايق أو يغضب أكتر من لما واحد يشتم فريقه.. طيب الكورة اتحولت لوحدها كده من مجرد لعبه ل "انتماء".. ولا في حد حولها.. ولا في حد بيستفيد من تحولها ده؟

الحكومات من سنين كتيرة حاولت تشبع رغبات الشعب في إنه يبقى عنده انتماء لحاجة مهمة.. فعملتله بديل يشبعه ويخليه ينسى الانتماءات الأصلية.

واحدة من مظاهر التحول هي صورة ل "طفل" كان بيعيط عشان فريقه خسر.. طيب إيه الأسباب اللي تخلي واحد يعيط عشان فريق كورة.. ده "فريق كورة".

ناس بتعيط عشان شافوا فريقهم بيخسر.. في حين إنهم لو شافوا قتل وموت مش هتتحرك في جتتهم شعرة.. لا وكمان ممكن يشتموا فيهم ويتهموهم بالإرهاب.. ناس بتعيط عشان فريقهم خسر.. في حين إنهم لو شافوا السوريين في المخيمات مش هتتحرك أي حاجة فيهم.. لو شافوا اقتحام المسجد الأقصى في فلسطين حتى مش هيرفضوه.. مش هيحسوا حتى بالاستنكار للي بيحصل هناك.. مبروك.. إنت عملت اللي الحكومة عايزاك تعمله.. مش ملاحظ إنك بتضيع عمرك على حاجه تافهة ولا إيه.. الطاقة ديه والشغف ده ممكن تسخره لحاجه أفضل.. أنا مبقولش إن الرياضة وحشة ومش مهمة.. بالعكس من غير الرياضة مش هنعرف نعيش.. حِبها والعبها بس متخليهاش تلهيك عن الحاجات الأساسية والانتمائات الأَولى باهتمامك وانتماءك.. حب الرياضة بس متخليهاش تطغي على حاجات مهمة في حياتك..