المدونة

نعرض أحدث الآراء و التحليلات لأبرز مدوني هافينغتون بوست عربي

هيثم سعد عبده  Headshot

هذا ما تعلمته بعد 5 سنوات زواج.. إليك تجربتي

تم النشر: تم التحديث:

ملحوظة: التدوينة بالعامية المصرية

قبل أيام اكتملت سنواتي الخمس في الزواج
ح احكي عن تايم لاين بشوية أحداث كده، حصلت في الخمس سنين اللي فاتوا.

2011-2012
- الخطوبة
لما روحت لأهل زوجتي أطلب إيد بنتهم، يومها كلمتهم بشفافية مطلقة، وصراحة "مبالغ فيها":
(أنا ظروفي كيت كيت كيت، حاقدر أجيب دهب كشبكة بمبلغ "خمس آلاف جنيه")- وكان رقم قليل جداً جداً جداً وقتها، وماعنديش شقة تمليك، ولا في خطتي -القريبة على الأقل- إني أتحصل على واحدة، وأنا اللي حاتكفل بمصاريف زواجي كاملة (مش حاخلي حد يدفع لي مليم)

- وافقوا، وثمَّنوا هذا الموقف، وقدوره
(قبل ما نشتري الشبكة بيومين نزلت زوجتي مع حماتي، اتفرجوا على الدهب وشافوا إيه اللي ممكن يبقى مناسب للمبلغ، بحيث ينزلوا عليه يشتروه على طول، من غير ما أنا اعرف إنهم عملوا كده).

اتفاقي معاهم كان على 3 سنين خطوبة كحد أقصى (ربنا رزقني وتزوجت بعد أقل من السنة!)

2012 - 2013
الزواج

- بعد الفرح، حماتي ربنا يسترها ويبارك فيها كانت كل زيارة تيجي لنا فيها، تجيب لنا "خزين للبيت" مكرونات وسكر وزيت ورز وخلافه، وقعدت فترة طويلة تعمل كده.

- أبويا وأمي الله يكرمهم، كانوا كده برده، أمي كل يومين تلاتة كانت تبعت لي حاجات من اللي تتحط في البيت وما تخسرش، أبويا (أدامه الله فوق رؤوسنا) كان كل يوم ويوم الصبح يروح يقف في طابور العيش في الفرن يجيب العيش سخن، ويروح يشتري فول وطعمية ويجي لنا بيهم البيت علشان نفطر بيهم. وقعد كده فترة طويلة جداً جداً، ولما كنا بنقول له يا حج، ما يصحش كده، ده واجب علينا أنا كبرت ع الكلام ده

يرد ويقولي: هو انت مفكر نفسك حتبقى كبير عليَّ؟

- بعد الفرح بشهرين (كنت متزوج في أول الصيف، فقاعد من غير شغل كمعظم المدرسين) المبلغ اللي كنت محوشه + "النقطة" اللي جت لي بعد الفرح كانت خلصت، ومررنا بضائقة مالية عنيفة، وقتها زوجتي عرضت تبيع الدهب بتاعها، ونفك بالفلوس دي زنقتنا، وقد كان!

- في فترة حمل "نضال" أول 3 شهور كان الحمل حرج جداً (اللي هو ممكن ترجَّع اللي في بطنها عشرين مرة في اليوم، لأقل سبب!!)، لكن عمرها ما حسستني بالضغط اللي هي كانت فيه.

- بعد ولادة نضال، زوجتي كانت بتقتصد من مصروف البيت وتدخر الفائض على جنب لميزانيات الطوارئ، بدون ما اطلب منها.

- بعد سنة واحدة زواج حصل الانقلاب، اللي اتشقلبت حياتنا معاه، ولم أعهدها إلا صابرة.

2013 - 2014

- عام القضايا والأحكام وقرارات الضبط والإحضار، مع أول قرار ضبط وإحضار في ديسمبر/كانون الأول 2013 اتشقلبت حياتنا، نقلت من سكني اللي تزوجت فيه، وقعدت عند حماتي فترة طويلة لحد ما لقيت سكن بعيد في محافظة تانية (في الفترة دي اعتقل عديلي -زوج أخت زوجتي- وما زال قيد الاعتقال حتى الآن).

- نقلنا لمكان جديد علينا، بتغيير كامل لعاداتنا وتصرفاتنا، وحتى المرادفات اللي بنستخدمها مع الناس!

2015-2016

- الخروج الكبير من مصر، والانتقال منفرداً للتجربة الأسوأ على الإطلاق اللي مررت بيها حتى الآن "كل ما افتكر تفاصيل الفترة دي قلبي ينقبض "وما عهدتها إلا صابرة!"

- انتقلت أم نضال للعيش مع حماتي

- العفش بتاعنا مابقاش فيه حتة سليمة (اللي يعرف أم نضال يعرف أد إيه النيش عزيز عليها مثلاً).

- مررنا بضائقة مالية (التكلفة الخروج من مصر) اضطررنا معها لبيع الأجهزة الكهربائية اللي اتجوزنا بيها :)

- أخو زوجتي اعتقل

2016 - 2017

- ربنا جمعنا على خير في مكان جديد غير مكان التجربة الأولى اللي انتقلت لها منفرداً.

- حصل "إجهاض" مرتين ورا بعض في أقل من سبع شهور، وكانت تجربة نفسية سيئة جداً عليها، مش بس علشان الموقف نفسه، لكن علشان مداخلات بعض الناس اللي ممكن تكون بتحدف طوب في كلامها :)

- هو انتي سقطتي/ أجهضتي ليه؟
- هو انتي مش ناوية تخاوي نضال بقي؟
- هي الدكتورة قالت لكي حتعرفي تحملي تاني؟
لدرجة إن في ناس كانت بتخاف على عيالها من الحسد :))

- أزعم أني ممكن أقدم الدعم النفسي لحد أعرفه في موقف مشابه، لكني عجزت عن تقديمه في حالتنا فعلاً!

- وما وجدتها إلا صابرة

- بيحصل مشاكل وقفشات في البيت زي أي بيت، يبقى مهارتها في احتواء المشاكل وعدم تكرارها والتعامل معاها.

- الانقلاب وتبعاته شوه نفسيتي بشكل أنا نفسي مش مستوعبه حتى الآن، وما زالت صابرة.

خمس سنين زواج ع الحلوة والمرة، وبلاد تشيلنا وبلاد تحطنا، ونضال مالي علينا البيت، ربنا يحميه ويحفظه.

نصيحة للمقبلين على الزواج، إياك/ إياكِ تتعاملوا مع الحياة الزوجية على إنها حاجة "بالورقة والقلم".

- تغافلوا.. ثم تغافلوا.. ثم تغافلوا

- التعامل مع شريك الحياة بأسلوب "الندية" حيخسر الطرفين.

- دوَّروا على "ولاد الأصول" (مش الأغنياء ولا اللي بيتكلموا كويس، ولا اللي بيبحثوا عن "الشغف" بتاعهم!، وبلا بلا بلا)

- الزواج عملية اجتماعية معقدة، مش بس ارتباط شخصين، الزواج ارتباط عائلتين ببعض (عائلة بالمفهوم الواسع).

- اتجوزوا اللي تحسوا معاه إنه حيشيلكم في وقت ما الدنيا تلطش معاكم.

وأخيرا اتجوزوا اللي ما تقولش لك تعالى اتسوق معايا لأن الحريم حيطلعوا >«@<^*^ أهلك في "الشوبينج"

اللي هو المشوار اللي إنت ممكن تقضيه في ربع ساعة يخلصوه في 3 وما يجيبوش اللي هما عاوزينه في الآخر :)

وطبعاً لو لقيت واحدة إعدادات الألوان عندها زي إعدادات ألوان الويندوز الأساسية (من غير الشبع درجات بتوع الموف، أو الخمستاشر درجة بتوع البني، اكتب كتابك عليها على طول).

وطبعا مش محتاج أقولك اتجوز واحدة بتعرف تطبخ

طبعا نسيت اقولك لو لقيت واحدة بعد الجواز بترد على التليفون من أول مرة، اعرف إنك اخترت صح يابني، أنا اعرف ناس واخدين الميدالية الذهبية في عدم الرد ع الموبايل.

ملحوظة:

التدوينات المنشورة في مدونات هاف بوست لا تعبر عن وجهة نظر فريق تحرير الموقع.