المدونة

نعرض أحدث الآراء و التحليلات لأبرز مدوني هافينغتون بوست عربي

فاطمة الزهراء ركابى Headshot

#الفشل_علمني | لازم تفشل عشان تنجح

تم النشر: تم التحديث:

هذه المدونة بالعامية


الفشل .. مرحلة كل انسان منا لازم يمر بيها .. وكانوا زمان يقولولنا "لازم تفشل عشان تنجح" .. انا عن نفسى دايما كنت بنتقد الكلام دا وبالذات الجمل دى مكنتش بقتنع بيها لغاية اما مريت بتجرب الفشل دى فعليا .
من وانا صغيرة طول مراحل الابتدائى دايما بطلع من الاوائل على المدرسة ووصلت لمرحلة الاعدادى بقيت اطلع على الفصل بتاعى وكنت دايما اقعد اقف قدام قايمة الطلبة الاوائل فى نص المدرسة وانا متدايقة وارجع البيت ماما كانت دايما تزعل انى مابطلعش وتقولى اشمعنى فلانة وفلانة يطلعوا وانتى لا وكلام الاماهات ف المراحل دى انتى زيك زيهم والمفروض انكم من نفس المنهج بتذاكروا يبقى ليه مقصرة !! ..
للاسف انا كان حظى مش زى باقى زمايلى ممكن اهلهم يتجاهلوا موضوع الترتيب والاوائل بس انا لان ماما كانت شغالة فى المدرسة اللى بدرس فيها ف طبيعى تعرف كل مرة مين طلع ومين لا ..
انا من الناس اللى بتقنع نفسها باللى بتقوله ف كنت اما اقعد فى اوضتى عشان اذاكر مع نفسى اقنع نفسى بكام جملة وهما ان التعليم بيفرق من الابتدائى عن الاعدادى وانه مواد اعدادى اصعب وعشان كدا كفاية انى اطلع على الفصل وكتر خيرى اساسا !
كل شهر اقول لنفسى كدا مع كل مرة اشوف قائمة الطلبة الاوائل لغاية ما جيت للثانوية العامة "رعب الطالب المصرى" .. فى المرحلة دى بالذات كل تركيزى كان انى اوصل للكلية اللى بتمناها زى باقى زمايلى ومركزتش اطلع بقى من الاوائل ولا لا لان خلاص اقنعت نفسى بجملى اللى بقولها .. جيت فى سنة تانية جبت 91.9% وكان البيت فرحان بيها لانهم حطوا امل انى لوشديت حيلى السنة اللى بعدها جايز ارتفع واجيب مجموع الكلية اللى بحلم بيها ..
جات سنة تالتة ثانوى وكسلت اكتر واكتر فى موضوع انى اذاكر بجد بقيت اركز على مواد اللغة زى العربى والانجليزى وارمى المواد العلمي زى الاحياء والفيزياء وغيره لحد ما جه يوم الامتحان وانا داخلية ومجمعة يدوب من هنا شوية ومن هنا شوية وتقريبا كنت بسمع البنات زمايلى بيتكلموا فى حاجات انا مكنتش بعرف عنها حاجة حرفيا اول مرة اسمعها ..
يوم النتيجة .. "يوم فيه يكرم المرء او يهان" .. المفاجاة كانت صدمة للبيت كله نزلت بمجموعى للاسف ل 84.6% !!
الكلية اللى بحلم بيها راحت وحسيت بمعنى الفشل ومدى تفاهة الجمل اللى كنت بقنع بيها نفسى .. فترة انى املأ الرغبات بالكليات - اللى متاكد انى مش هافهم وولا هارتاح فى ولا واحدة فيهم- كانت فى منتهى البؤس اتغربت وجاتنى كلية برا محافظتى ومقدرتش اكمل فيها ورجعت كلية الاداب فى محافظتى واكتشفت بالصدفة ان فى قسم للاعلام جديد اتفتح وقولت اما اجرب حظى .. وفعلا قدمت والحمد لله اتقبلت ولقيت نفسى فى حاجة انا نفسى مكنتش اعرف انى هاحبها وكنت فاقدة الامل .. سنة اولى عدت على خير وجبت تقدير امتياز .. وجت تانى سنة وجانى شغل وقضبت اول مرتب ليا وكنت مبسوطة بيه جداااا واخدت دروع كتير فى مسابقات للصحافة ..
وادى تالت سنة عدت بتقدير عالى برضو الحمد لله واخر سنة اللى انا فيها هابدا تدريبى فى قسم الاذاعة وهاشتغل ان شاء الله حاجة انا حاباها ..
بقيت دلوقتى اكتر اجتماعية واتعرفت على ناس كتير بقوا حاج مهمة واساسية فى حياتى واقتعنت بجملة " لازم تفشل عشان تنجح" وانا شايفة انى فى بداية طريقى للنجاح ..
اصبر عافر وامشى فى الطريق اللى كتبهولك ربنا .. متعرفش الخير فين وحب اللى انت فيه ودور كمان على اللى بتحبه عشان تلاقى نفسك ..

ملحوظة:

التدوينات المنشورة في مدونات هافينغتون بوست لا تعبر عن وجهة نظر فريق تحرير الموقع.