المدونة

نعرض أحدث الآراء و التحليلات لأبرز مدوني هافينغتون بوست عربي

إنجي إبراهيم Headshot

15 اكتشاف عن الحياة الزوجية

تم النشر: تم التحديث:

ملحوظة: التدوينة بالعامية المصرية

بمناسبة مرور سنة على جوازي فحبيت أتكلم في المقال ده عن اكتشافاتي في الحياة الزوجية، والحاجات اللي اتعلمتها.

ما تيجوا نشوف:

1. الحب وحده لا يكفي
الحب لوحده مش هيخلينا نقدر نكمل، مش معنى إننا بنحب بعض إننا هنقدر نتعايش في حياة جديدة تمامًا علينا إحنا الاتنين، لازم قدر هائل من التطنيش والتفهم، ممكن كمان شوية تناحة، يعني كل واحد المفروض يكتشف الكوكتيل اللي هيمكّنه من استكمال المسيرة، ويخرّج من دماغه خالص إن الحب لوحده كفاية.

2. الفقر لو دخل من الباب الحب بينط من الشباك
ده مثل شعبي قديم، بس على فكرة طلع صح جدًا، الفقر بيقتل الحب، مش بقول إننا هنتخلى عن بعض، بس الفلوس بتقدر توفرلنا حياة كريمة تخلينا عندنا طاقة نحب بعض.

3. المواعين لا تفنى ولكن تستحدث من العدم
أظن مش محتاجة شرح، مش عايزين نقلّب مواجع بعض.

4. هتتخانقوا.. كتيييييير
مش معنى إننا بنحب بعض أو إننا متفاهمين إننا مش هنتخانق، لا هنتخانق وهنتخانق كتير كمان، بس مش معنى كده إن دي نهاية الحياة، فمتقلقيش الخناق ده شيء عادي.

5. الأطفال أحباب الله بس
مش لازم يكونوا أحبابي أنا كمان، عادي جدًا إنك تمنعي الحمل فترة، خلينا نقف على رجلينا الأول وبعدين نجيب طفل، أو منجيبش كله بإيد ربنا، بس متخليش حد يقنعك إن ده غريب وإنك كده بتعترضي على حكمة الخلق وناموس الكون.

6. راح فين زمن الشقاوة يا حسين
آآآآآآآآه زمن الفسح و الخروجات والكافيهات خلص خلاص، لازم ننام بدري عشان نصحى بدري، ويوم الأجازة نأنتخ عشان نتحمل تعب باقي الأسبوع، وبعدين ما إحنا خرجنا كتير واتشاقينا كتير، هننهب؟

7. الأم طلعت مدرسة فعلاً
علاقتك بأمك هتتغير تمامًا بعد الجواز، هتحسي بخبرتها اللي كنتي بتعترضي عليها طول حياتك وهتعجبك حكمتها في معالجة الأمور، وهتتأكدي إن حبها كان ولا زال حب غير مشروط.

8. وعشق الروح ملوش آخر لكن عشق الجسد فاني
كدب.. كدب.. كدب، العلاقة الحميمة شيء مهم جدًا وحيوي جدًا جدًا في الحياة الزوجية؛ "من يمتكلون جنسًا جيدًا يمتلكون حياة جيدة"، سيبك من كلام الحب الأفلاطوني ده، مبيأكلش عيش.

9. إنتو بني آدمين
آه والله، بني آدمين عاديين، مش زي اللي كنتوهم أيام الخطوبة والحب الأولاني، عادي جوزك يشخّر وهو نايم، وعادي إنتي يجيلك إسهال، عادي يكون زِيّه الرسمي في الصيف هو البوكسر، وعادي إنك تهرشي في شعرك وإنتي قاعدة قدام التليفزيون.

10. الأميرات أيضًا يصنعن المحشي
أنا عارفة إنك كنتي متدلعة في بيت بابا، وماما هي اللي كانت شايلة الطين كله، وإنتي كنتي برنسيسة بتصحي من النوم تضايقي إن ماما لسه قدامها خمس دقايق على ما تحضر الفطار، أهو نفس البرنسيسة دي هي اللي هتقف تعمل محشي، اقبلي الحقيقة دي وتعايشي معاها.

11. جوزك مش سوبر مان
جوزك شخص عادي جدًا، من حقه يتعب ويُرهَق ويكتئب، من حقه ميبقاش الفانوس السحري اللي هيحققلك كل طلباتك في الحياة، هو بني آدم؛ ادّيله الحق في آدميته عشان هو كمان يديكي نفس الحق ده.

12. هم في البعد أحلى وفي البعد أنقى وفي البعد أرقى
مهما كنتي بتحبي أهل جوزك، ومهما كان أهلك بيحبوه، مهما كنتي متفاهمة مع حماتك/ أخت جوزك/ سلفتك، بلاش تبقى علاقتكم قريبة أوي، الحدود حلوة جميلة، عشان تفضلوا كويسين في نظر بعض ومتحصلش مشاكل سخيفة من عينة أختك كان قصدها إيه لما زغرتلي.

13. جوزك عنده عمى ألوان ومصاب بالتوحد
صدقيني لو اتعاملتي معاه وإنتي مصدقة الحاجتين دول هترتاحي جدًا، جوزك ميعرفش الفرق بين التركواز والجانجاه، ومتستنيش إنه يفهم يعني إيه بستاج، وكمان هو مصاب بالتوحد وبيفهم الكلام بمعناه الحرفي، فلما تقوليله إنك كويسة هو بيفهم إنك فعلاً كويسة، لو عايزة حاجة قوليها بوضوح وبصوت عالي، متسيبيهوش يستنتج حاجة.

14. إيدك خليها في إيدي أنا طفل كبير
مش لازم يغنيهالك بصوت علي الحجار، الرجالة فعلاً أطفال، بس طوال أوي وساعات بيكون عندهم كرش، عنده نفس مميزات وعيوب الأطفال، عنيد وأناني وشقي زي الأطفال، بس طيب وبينسى بسرعة ودمه خفيف، إنتي ربنا رزقك بعيل بس كبير شوية، هتعترضي على عطية ربنا؟

15. الحياة مش سهلة بس مستاهلة
من يومين كنت بشوف فيلم أجنبي، واحد من الشخصيات الثانوية كان بيقول إن وهو صغير كان فاكر إنه سعيد، بس دلوقتي هو متأكد إنه سعيد، وختم كلامه بجملة "I know I'm happy, exhausted but happy".

بعد سنة من الجواز، ومن المطبات الهوائية اللي واجهتني أنا وجوزي، وكمّ الأحداث غير العادل اللي حصلتلنا الفترة اللي عشناها مع بعض، ورغم كل الحزن والوجع اللي واجهنا، والمشاكل اللي رقصت حوالينا رقصة الهنود الحمر في انتصار، أنا أقدر أقول إني اكتشفت إني سعيدة، مُستنزَفة بس سعيدة.

وسمّعني سلام والله وعملوها الرجالة.

- تم نشر هذه التدوينة في موقع نون