المدونة

نعرض أحدث الآراء و التحليلات لأبرز مدوني هافينغتون بوست عربي

بسمة السباعي Headshot

إهدى شوية يا مدام

تم النشر: تم التحديث:

ملحوظة: التدوينة بالعامية المصرية

لازم تبطلوا تقولوا للمتجوزة: "ها بقى مفيش حاجة جاية في السكة؟!".. وللي مش متجوزة: "ها بقى مش هنفرح بيكي وإنت لابسة الفستان الأبيض!".

لازم تبطلوا تقولوا للي مخلفة بنات: "يلّا بقى اتجدعني كده وهاتي لنا حمزة!".. لازم تبطّل ترد على اللي بيقول لك مبروك بـ"عقبالك"! أصلاً مين قال لك إنه نفسه يبقي "عقباله"!

ولازم تعرفي إنك كبنت "متجوزة" فده يا عزيزتي شيء ما يتحسدش، وشيء طبيعي بزيادة، متوفر في كل نواحي وأركان الكرة الأرضية! انت مش بتطيري زي "سوبرمان" يا مدام إهدى شوية!

لازم تبطّلي تقولي: "ابني ما بياكلش خضار ولا لحوم خالص"؛ لأننا لما بنقابلك بنلاقي ابنك "فيل" صغير ماشي وماسك ورك "بطة" في إيده وبيبّلع بميَّة "قلقاس"! بلاش كده والنبي، بلاش قرف بقى! جتك نيلة انتِ وابنك!

ومش لازم خالص لما تبهرينا وتقولي لنا إنك "حامل"، فتتبعيها بـ"والله اتفاجئنا"، أو "والله جت كده"، ولا لازم ترهقي نفسك إنك تقنعينا إنك في "الشهر الأول"، إحنا عارفين إنك عديتي الشهر "التالت".. إهدى بقي يا مدام احملي أو ما تحمليش ده شيء ما يهمش حد، فبلاش تستفزي اللي حواليكي وتخليهم يقولوا لك مبروك وهمَّا مش طايقين وشك.

مش لازم تفضلي تقولي إن ولادك مش بيذاكروا ولا بيفتحوا كتاب، ونقابلك نلاقي ولادك بيسمَّعوا أسماء الهكسوس هكسوسي هكسوسي!

مش لازم لما نقول لك على حاجة عندك "الله ده حلو أوي"، إننا كده بنحسدك وغيرانين وحاقدين وهنموت وتبقى عندنا! إحنا بنجاملك والله مش أكتر.. مجاملة باردة ونفاق اجتماعي يا جميلة!

باختصار.. مش لازم تحسي إنك محور اهتمام الكون، ولا إن حياتك خارقة للطبيعة، ولا إنك عايشة على كوكب المشتري ومحاوطة بكنوز الذهب والماس! انتِ حياتك عادية جداً زي حياتنا كلنا مرميّين في بيت فيه "نيش وبوفيه" وستاير ماليها التراب ومحدوفين قصاد قنوات "موجة كوميدي" وبناكل عادي، وعيالنا كلهم عاديين، وجوزك برضه عادي، فيه منه كتير، وصاحبتك اللي مش متجوزة مش هتحسدك، وجارتك "المطلقة" مش واقفة ع السلم بـ"قميص النوم الساتان"، وحاطّة حسنة فوق شفايفها وبتندغ لبانة وهتخطف جوزك!

الخلاصة.. محدش فاضي يركز في حياة غيره؛ نظراً لأنه أصلاً ما عندوش وقت يركز في حياته هو الشخصية.. فممكن نِهدَا بقى.

ملحوظة:
التدوينات المنشورة في مدونات هافينغتون بوست لا تعبر عن وجهة نظر فريق تحرير الموقع.