المدونة

نعرض أحدث الآراء و التحليلات لأبرز مدوني هافينغتون بوست عربي

العصماء محمد هاني Headshot

10 أشياء لا تعرفها عن زوجتك الحامل

تم النشر: تم التحديث:

التدوينة بالعامية المصرية

1- مراتك بذلت مجهود كبير في الفترة الأخيرة لإقناعك بإنها البسكوتاية الرقيقة والكائن الأقحواني ذو الأجنحة الهشّة، اللي لازم كل يوم قبل ما تنزل للشغل تطبطب عليه وتركنه جنب الحيط خوفاً عليه من الهوا.

مش مشكلة..
نظرتك هتتحول في أول مرة مراتك هترجّع (تتقيأ) فيها كأولى علامات الوَحَم.
متتخضش وحاول تخلي مشاعرك وانفعالاتك ثابتة ومتنزويش إلى الركن البعيد الهادي، وقولها قد إيه هي بسكوتاية حتى وهي بتجيب كل اللي في بطنها.

2- أنا عارفة إنك تعبت جداً ولفّيت الكرة الأرضية عشان تلاقي ثمرة الولابولوا البرتقالية اللي مراتك نفسها هفت عليها..
معليش..
بعد ما جبتها هتضطر إنك تخلصها بنفسك؛ لأنها إذ فجأةً مبقتش طايقة اللون البرتقالي من أساسه.

3- إوعى تبين لها إنك زعلان من نكدها وفقرها..
فيه حاجة دلوقتي مسيطرة عليها اسمها هرمونات.. حذاري -يا عزيزي الراجل- تسمح للهرمونات إنها تنتصر عليك.. خليك إنت دايماً المنتصر.. خليك لوح تلج!

4- حاول تلاقي محل أكل كويس وبيوصل دليفري في أي وقت.. هتتصاحب عليه أكتر من مستر هيثم رئيس خزنة المرتبات والحسابات.
5- متتخضش لو لقتها في لحظة بتاكل دراعك...!
زي ما اتفقنا دي هرمونات.

6- حاول متسبش مشاعرك تنجرح لما تقولك "مش طايقاك" وخليك زي Gary في فيلم "What do you expect when you'r expecting"، كان مهما حصل يقول لمراته "عزيزتي إنكِ تبلين حسناً".

7- صدقني أيام الدلع انتهت، انت داخل على منحنى تاريخي، إوعى تفقد السيطرة على نفسك وإوعى تغلط وتبدي أي ملاحظة عن المناخير.

8- بعد نص الليل، هتلاقي حد بيخبط فيك وبيصحيك بصويت وزعيق وكأن نهاية العالم بدأت... أول مرة هتتخض وممكن متعرفش ترجع تنام... بعد كده هتتعود عادي.. دي مراتك عاوزة تتقلّب وتنام الناحية التانية ومحتاجاك تشد معاها.

9- أنا مقدرة تسهيمتك وصدمتك وبؤسك بعد أول شوبينغ لهدوم البيبي... صدقني إحنا كمان كنا فاكرين إن الموضوع كله غيارين وعلبة بامبرز وببرونة لزوم الدلع.

10- عارفة إن رقبتك اتلوحت من كتر ما بتوطي على بطنها عشان تسمع صوت دقات قلب البيبي... وعارفة إنك مش سامع حاجة.... وعارفة إنك بتضحك عليها وبتفهمها إنك سامع حاجة!

ملحوظة:
التدوينات المنشورة في مدونات هاف بوست لا تعبر عن وجهة نظر فريق تحرير الموقع.