المدونة

نعرض أحدث الآراء و التحليلات لأبرز مدوني هافينغتون بوست عربي

كاتي عياد  Headshot

#الفشل_علمني | الفشل مبهر

تم النشر: تم التحديث:

هذه المدونة بالعامية

كلمة الفشل دايما ليها رنين مزعج ومحبط على مسامعنا

وفى الأغلب بيصاحبها شعور ضيق أو يأس أو حتى ندم
لكن مع الوقت والتجارب أدركت أن أكبر النجاحات هي اللي بتيجي بسبب فشلنا في مواقف كتير
وبقيت مصدقة أوي في جملة "الناجحون هم من فشلوا سابقا"
وأن النقطة اللي بنقع عندها هي هتكون نقطة التغيير الفعلي في حياتي ، نقطه أقدر أسمي حياتي فيها ما قبل فشلي وما بعده
لولا فشلنا في صداقاتنا القريبة مكناش هناخد وقفة ونقيم مفهومنا لمعنى كلمة صداقة
ونقيم سلوكياتنا تجاه اللي حوالينا و نبص بعمق على نفسنا من جوه هي عامله إزاي ، طيب هو العيب فيا ولا فيهم ، في شخصيتي اللي مش عارفة تتكيف مع اللي حواليا ولا في اختياراتي المتمثلة فيهم
ومن هنا ببدأ أعدل الموقف وأصلحه وأحط إيدي على المشكلة
اللي مكنتش هعرف بوجودها أصلا لولا فشلي في العلاقات دي
وأبدأ أقيم مثلا نوعيات صداقاتي اللي فشلت دي
هل هي كانت علاقات نفعيه؟ يعني مؤقتة وبتاعة مصلحة ولما كل حد مصلحته تخلص بيمشي
ووقتها أنا اللي بنهار أو أعيش دور المجروح المغدور بيه من اللي حواليه
ولا هي علاقات أصلا سطحية و بقول إني فشلت فيها كنوع من هروبي إني أقول معنديش دايرة صداقات أصلا
وأهو قضى أخف من قضى مثلا!!
ولا طرف فينا بيتغير عن طبيعته اللي أصلا اتعرفنا على بعض على أساسها؟!
مينفعش أبدا فشلي في دايرة العلاقات الاجتماعية يقف عند مرحله الندب أو الحزن أو التأثر وبس
لكن مفروض يتجاوز المرحلة دي لمرحلة اسمها التقييم بقى
أعمل زي الدكتور الشاطر وأحط إيدي على المرض عشان أعرف أحدد طرق العلاج بشكل سليم

وكمان أغلبنا مر على الأقل لمرة واحدة بتجربة فشل في الارتباط
اللي من أهم معالمها ، الدموع والأغاني الحزينة وفترة التقوقع في الذات
والغوص في الذكريات ، والشحتفه والآهات ، ويمكن وصلت مع البعض لمراحل اكتئاب حقيقي
بس الفترة دي سواء طالت مدتها أو قصرت ، محدش فينا يقدر ينكر إن دي المرحلة
اللي ليها أكبر فضل علينا
لأن الفشل ده اللي بيعلم الواحد بعد كده يعنى ايه ارتباط حقيقي
وبيت هيتبنى وأسره هتتكون وأطفال محتاجين تربية سليمة، يعني ايه اختيار شريك حياة
وحياة مش هتبقى وردي وهيقابلنا فيها مشاكل ومش كل طموحاتنا المستقبلية هتتحقق
فشلي في الارتباط لأي سبب كان
هو اللي بيديني خبره بعد كده ويعلمني إزاي أختار صح، وبناء على ايه أختار
بيعلمني أبص جوايا قبل مدور على نصي اللي عاوزاه يكملني
وأعرف أنا جوايا ايه ويناسبني ايه ومحتاجه ايه عشان بعد كده أبدأ رحلة بحثي عن اللي يناسب حياتي ويلائمها ويجملها
و الفشل ده بردو اللي هيعلمني لما أختار صح أبقى مدركة مفاهيم كتير زي التضحية، التسامح، التحمل، الحب، المسؤولية
من منطلق إنى في ضوء علاقة فاشلة سابقة هقدر أعرف أتمسك بعلاقة ثانية وأنجحها لإنى هتفادى كل الأسباب اللي أدت لفشلي قبل كده
ويمكن كمان وقتها أتقبل فكرة إن محدش كامل وإن بلاش متطلبات كل حد فينا اللي عاوزاها فى الآخر تكون مثالية أوي أو بصوره أقرب للكمال اللي طبعا محدش هيلاقيها
ويمكن وقتها بردو أتقبل فكرة التنازل في مقابل إنى لقيت حد فعلا بيكملنى وانه جزء من طريقه حبى الصح ليه هي إني أتقبل عيوبه زي ما هيتقبل عيوبي
بيحصل حاله من النضج في طريقة اختياري وارتباطي وبيحصل نضج كمان في طريقة استمراريتي في العلاقة دي ،
بقى مدركة إن مفهوم الحياه بين اثنين أعمق وأكبر من إنه يقف عند تفاصيل صغيرة كنت بقف عندها زمان و كانت الدنيا بتبوظ .

الفشل ليه عده فوائد ومن أمثلتها:

*الفشل حلو جدا للي عنده عين تقدر تستخدمه نحو انطلاقة أفضل
*الفشل ممتع للي هيقدر يستمتع وهو بيخرج منه طاقة نجاح كبيرة
*الفشل مفيد لأنه هيخليك تختبر شعور اللي هيقع فيه فهتقدر تحس بيه وتساعده
*الفشل شيء عادي كلنا معرضين ليه لإننا من خلاله بنتعلم بالتجربة
*الفشل بيساعدنا نبقى أقوى وأنضج لما نحوله لنقطة تحول حقيقية في حياتنا
*وقت الفشل بيكون وقت حلو نعرف معادن الناس من حوالينا
*الفشل فرصة قوية عشان تقول لنفسك أنا قوي و تشوف ده بعينك
*الفشل حدث بيعرفك أن كلنا بنغلط ، عشان بعد كده لا تدوس على ضعف وفشل حد ولا تستكبر على حد
*لو فشلت في أي حاجة ونتيجة لأي سبب، خد وقتك وازعل واحزن وطلع انفعالاتك وأما تهدى تأمل كم الفوايد اللي ممكن تستغلها من تجربة الفشل دي:)

ملحوظة:

التدوينات المنشورة في مدونات هافينغتون بوست لا تعبر عن وجهة نظر فريق تحرير الموقع.